[Bideoa eta galeria] Omenaldirik onena, zahartzaro duin bat
Duintasuna kalera itzuli da gaur. Pandemiaren aurreko aldarrikapenak errepikatu dituzte, baina normaltasuna ez dela itzuli, edo ez ohikoa dela argi gelditu da.
Duintasunaren omenaldia eta elkarretaratzea gaur. Duintasuna kalera itzuli da gaur. Pandemiaren aurreko aldarrikapenak errepikatu dituzte, baina normaltasuna ez dela itzuli, edo ez ohikoa dela argi gelditu da; parte hartzaile guztiek errespetatu dute distantzia fisikoa, eta ia guztiek zuten maskara soinean. Gaurkoa aldarrikapenerako hitzordua izan da, baina batez ere omenaldi ekitaldia. Omenaldia, COVID-19k hil dituen horien guztien omenezko ekitaldia, eta bereziki, adinekoen egoitzetan hil direnei.
11:00etan egin dute hitzordua Herriko Plazan. Hildakoak gogoan, haien senide eta hurbilekoei elkartasun osoa adierazi diete bildutakoek. Esker mezua, eta babes osoa helarazi diete, bestalde, adinekoen egoitzetan eta Etxez etxeko zerbitzuan lanean ari diren profesionalei, “zuen esfortzua eta entregarengatik, babes ekiporik gabe zuen bizia ere arriskuan jarri duzuelako behar gehien dutenak artatzeko”.
Adinekoen egoitzetan COVID-19arekin kutsatutako pertsonak baldintza prekarioetan eta bitartekorik gabe artatu dituztela salatu du, bestalde, jubilatu eta pentsiodunen elkarteak, “osasun krisi honek agerian utzi du gizartean dagoen balio eta gizatasun gabezia, batez ere arlo politiko, ekonomiko eta instituzionalean. Beharrezkoa da, presazkoa, balio etiko eta sozialak berreskuratzea. Beharrezkoa da Osakidetza, etxez etxeko zerbitzua, edota menpekotasunerako zerbitzu publikoak moldatu eta indartzea. Ezinbestekoak diren zerbitzu horietan murrizketa handiak egin dituzte zerbitzu pribatuen mesederako, duela urte askotik salatzen ari garen moduan”.
Gaur Herriko plazan bildu diren adineko pertsonek, jubilatu eta pentsiodunek ez dutela ahaztuko profesional horiek erakutsi duten ausardia eta egin duten sakrifizioa esan dute, “ez dugu ate atzean botatzen utziko”.
Azalpenak eskatuko dituela ere esan du Duintasunak, “inplikatuta dauden arduradunei, kasu honetan Gipuzkoako Foru Aldundiari, gure herriko udalari, eta jakina, Eusko Jaurlaritzari. Arartekoarenera ere joko dugu, gertatutako ikertu dezan bere eskumenen barruan”.
Elkarretaratzea konpromiso batekin amaitu dute bildutakoek: “Kalitatezko osasun eta zaintza zerbitzu publikoen alde lanean jarraituko dugu, adinekoak merezi dugun duintasunarekin zainduak izan gaitezen”.
Galerian bildutako argazkiak eta bideoa Mikel Martin eta Toni Menendezenak dira.
