Dianak, mendekosteak izan behar zirela ez ahazteko
Dianak, mendekosteak izan behar zirela ez ahazteko. Herriko txistulariek asteburuko goizetan musika jarri dute kaleetan, lezoarrak gozo esnarazteko.
Asteburuan izan behar ziren Oarso Bidasoko lehen jai handiak, Lezoko Mendekoste Jaiak. Ez dira egin, denongatik ezaguna den osasun larrialdi egoeragatik. 2021ean itzuliko da Zabarre herrira, ziur. Herriko txistulariek, ordea, izan ez denaren nolabaiteko aldarrikapena egin nahi izan dute Jai Batzordearen ekimenez. Bai larunbatean zein igandean dianak egin dituzte herria zeharkatuz, pirataz jantzita, nola ez. Festak ez dira egin, baina lezoarrak gozo esnarazi dituzte musikariek.
Hori bakarrik ez. Xalto eta Xaltok emanaldi berezia eman zuten online igande goizean, herriko haurrentzat gozagarri. Gainera, herriko hainbat balkoi eta leiho piraten ikurrekin mozorrotu egin ziren.
Ondoko argazkiak Lezoko Udaleko sare sozialetatik hartutakoak dira.
