George Floyden hilketa salatuko dute
Poliziak George Floyd hil zuen maiatzaren 25ean Minesotan (Ameriketako Estatu Batuetan). Larunbatean hilketa salatzeko elkarretaratzea egingo dute Herriko Plazan.
George Floyd oroitzeko mural bat Berlinen. Argazkia: wikipedia George Floyd hil zuen poliziak Minesotan (AEB) pasa den maiatzaren 25ean. Floyd atxilotu eta lurrean etzanda eta lotuta zutela, Derek Chavin poliziak bederatzi minutuz presionatu zuen Floyden lepoa; ondoan zituen Thomas Lane, Tou Thao eta James Alexander Kueng poliziak, eta haiek ere ez zuten ezer egin. Zazpi minutuan 16 aldiz errepikatu zuen Floydek ezin zuela arnasarik hartu, baina presionatzen jarraitu zuen Chauvinek, baita Floydek konorte galdu eta anbulantzia bertaratu zenean ere.
Argi zegoen Chauvinek hil zuela Floyd, eta haren familiak eskatuko autopsiak zein ofizialak ondorioztatu dute poliziak Floydi eragindako presioak hil zuela afroamerikarra, homizidioa izan dela.
Gertaera izan zenetik, hamarnaka eta hamarnaka mobilizazio izan dira Ameriketako Estatu Batuetan, eta larunbatean, Errenteria-Oreretan salatuko dute George Floydi gertatutakoa. 12:00etan deitu dute elkarretaratzera Herriko Plazan: “Kateatu, zigortu, bortxatu eta hil egiten zituzten lehen; gero, Ku Klux Klana eta apartheida sufritu zuten gero eta hil egiten zituzten; egun, poliziak lepoa estututa hiltzen dituzte. Arrazakeria akabatu, eta elkartasuna adierazi behar dugu”.
