Ostalarien eskariei bide emango die Pasaiako Udalak
Urratsak berandu eman arren, "pozik" agertu dira ostalariak, udal gobernuak haien aldarrikapenekiko erakutsitako prestutasunagatik. "Komunikazio eta elkarlan gehiago" adostu dute bi aldeek.
Aurreko astean bi aldiz atera ziren ostalariak haien egoeraz ohartarazteko. Irudian, Trintxerpen egindako elkarretaratzea. Lan egiteko zailtasunak zituztela eta, aurreko astean bitan atera ziren kalera Pasaiako ostalariak, baita jarduna ordu erdiz gelditu ere, haien egoeraz ohartarazteko. Bada, badirudi liskarra konpontzeko gai izan direla. Ostalarien eskariari jarraiki, astelehenean batzartu ziren Pasaiako Udala eta ostalariak. Bileran hitz egindakoarekin “pozik” daudela adierazi du Rafa Cristobal Antxoko Mimos tabernako langileak, eta gaineratu Izaskun Gomez alkateak “barkamena” eskatu ziela, neurriak ez hartzeagatik. Barkamen eskaera onartu eta udalari zintzotasunez erantzun diote. “COVID-19a dela eta, ostalaritzaz gain beste sektore batzuei arreta eskaini behar dietela ulertzen dugu”, dio Mimos tabernako langileak.
Udalaren aldetik Izaskun Gomez alkateak, PSEko zinegotzi Lore Suarez eta EAJko zinegotzi Nahikari Otermin joan ziren bilerara. Eta ostalarien aldetik barruti bakoitzeko bi tabernetako langileak; haiek ordezkatu zituzten Pasaiako 101 jatetxe eta tabernak. “Jarraibide zehatzak eta lan egin ahal izateko erraztasunak” nahi zituzten ostalariek, eta udal gobernuak eskari horiei bide emateko prest agertu da. Langileak azaldutakoaren arabera, udaletik datozen jarraibideak, idatziz helaraztea ontzat jo du Izaskun Gomez alkateak, “gaizki ulertuak saihesteko modurik onena zela esan zuen berak ere”.
Berriz ere, talka egin ez dezaten, “elkarlan eta komunikazio gehiago” adostu dute bi aldeek, eta tentsioak nabarmen egin du behera. Nahi zuten arreta jaso dute ostalariek. Onak izan diren neurriei ere aitortza egin diete: “Terrazen ordutegia zabaltzen uztea eskatu genion eta egoki iruditu zitzaion”. Terrazetan, beraz, 23:00ak arte kontsumitu ahalko da astegunetan eta 01:00ak arte asteburutan. Udako ordutegia ere mahai gainean jarri zuten langileek; neurri horrek, ordea, “udalbatzarraren onarpena” behar duela azaldu du Rafak
COVID-19aren ondorioei aurre egiteko diru laguntzen nondik norakoen azalpenak ere eman zizkieten. Taberna bakoitzak “700 euro finko” jasoko ditu, eta “aldagaien araberako beste 300”. Aldagai horietako batek “ezustekoa” eragin zuela adierazi du Cristobalek, izan ere, emakume ostalariek 100 euro jasotzea iragarrita zegoen. Haien artean eztabaidatu ondoren, emakume ostalariak udalarekin harremanetan jarri eta 100 euro horiei uko egitea erabaki zuten, berdintasunari lotutako irizpidea ez zelakoan. Hortaz, diru kopuru hori, ostalari guztien diru laguntza finkoetara gehituko da.
