Puntada eta begirada anitzekin jositako erakusketa
Nongoa naiz? del mundo erakusketak ateak zabalduko ditu hilaren 12tik Jantziaren Zentroan. Izen bereko proiektuan kultura ezberdinetako emakumeek sortutako jantziak bildu dituzte, besteak beste.
Bihar zabalduko dute erakusketa, hilaren 28ra arte. Argazkia: Herri Bizia Nongoa naiz? del mundo proiektua jarri zuen martxan pasa den urteko urrian Emausek Errenteriako Udalarekin elkarlanean. Interkulturalitatea lantzea zuen helburu, ehunka puntada eta askotariko begiradak biltzea jantzi bakarra osatzeko. Elkarren ondoan bizi diren pertsonak, bizilagunak, ezkaratzean edo espaloietan gurutzatzen direnak baina elkarren berri ez dutenak harremanetan jarri nahi zituen; gerturatze interkulturala zen finean, bilatzen zuena, eta gaitasun, ezagutza eta esperientzien trukean oinarrituta elkar aberastea.
Hiru hilabetez egin zuten proiektua. Helburua betetzeko bidea berriz, hiru jantzi tradizional jostea elkarrekin: euskal jantzi tradizionala, Ukrainiako eta Arabiakoa.
Jantziak sortzeko prozesua oso interesgarria izan zela esan dute proiektuaren arduradunek zein parte hartzaileek. Joskintza izan da bizipenak, esperientziak elkartrukatzeko aitzakia. Sortutako jantzi horietako bakoitzak historia bat izan du, emakume horietako bakoitzak bizitako esperientziaren bidez kontatua.
Orain proiektuan sortutako jantzi horiek, beste batzuekin batera erakusketa batean bildu dituzte; proiektuaren izen bera darama erakusketa horrek eta hilaren 12tik bisitatu ahalko da uztailaren 5era bitartean Jantziaren Zentroan. Guztira, hogei jantzi bitxi eta berezi, sortzeko moduagatik bildu dituzte bertara. Beste jantzi multzo hori diseinatzaile gazteek eta Emigrados sin fronteras, Ukrainia-Euskadi elkartea, Guardabarranco grupo de baile, eta MEXkadi etxea kultura elkarte mexikarrak elkarlanean sortutakoak dira.
