[Galeria] San Pedroko 'Libia' uretan berriz ere
Arinaldiaren hirugarren faseak, kirol taldeetako kide guztiek elkarrekin entrenatzea baimentzen du.
Sanpedrotarrak atzo hasi ziren uretan entrenatzen. Uztailaren 11n hasiko dute aurtengo denboraldia. Irudia: Xabi Isasa. Geldialdi luze baten ondoren, atzo uretara itzuli zen Sanpedrotarra Arraun Elkarteko Libia trainerua, arraunlari guztiak barruan zituela. Atzotik arinaldiaren hirugarren fasean da Hego Euskal Herria; fasea berriak, kirol taldeetako kide guztiek elkarrekin entrenatzea baimentzen du eta ondorioz traineruan arraun egin ahal izan zuten atzo aspaldiko partez.
Aurreko astetik lanean dira moreak, baina orain arte gimnasiora eta fosora mugatu da haien jarduna eta talde txikitan banatu behar izan dira. Hemendik aurrera, arraunlariak behar duten lekuan egongo dira. Dena den, pandemia bizirik jarraitzen duen seinale, hainbat segurtasun neurriri eutsi behar izan diete, musukoak dituztela entrenatu behar dute adibidez. Hilabete izango dute forma hartzeko, KAE liga uztailaren 11n hasiko baita, Pasaian.
Honako hauek, Xabi Isasak atzo Kalparrako ontziralekuan egindako irudiak dira.
