Kuadrillen eguna, ezberdina izango da
Agirre Lehendakariaren plazan eta herriko kaleetan barrena ez da izango aurten kuadrilla marearik; bai ordea olatu txikiak han-hemenka, itsaso handi eta zabala, baina batez ere feminista, parte hartzailea, euskalduna eta ekologista osatzeko.
Aurten ez da irudi hau errepikatuko, baina olatu txikiekin osatuko dute marea kuadrillek. Ezohikoak bihurtu ditu ospakizunak ere COVID-19aren osasun larrialdiak. Hirugarren fasea ezarri zuten atzo, eta horrekin egoera arindu bada ere, ardura eta zentzuzko jarrerak mantentzea ezinbestekoa da koronabirusak gure artean jarraitzen duen bitartean. Asko dira bertan behera utzi dituzten festak, auzoetakoak, eta ospatu dituztenek modu berezian egin dute, etxeetatik, balkoi eta leihoetatik.
Jaien ereduaren gaineko gogoeta egin zuten orain urte pare bat jaien antolaketan zebiltzan eremu eta arlo ezberdinetako eragile eta taldeek: Ordura arte ezaguna zen jai eredua agortutzat eman zuten, eta beste erdu baten bila abiatu herritik sortu eta herriarentzat izango zen jai eredua egi bihurtzeko. Hala sortu zuten OaingozHau mugimendua. Antolaketa eredu parte hartzaile, feminista, euskalduna eta ekologista da berea.
Sortu eta bi urtera berrasmatzera eraman du pandemiak mugimendu hori ere. Kuadrillen eguna egin egingo dute, baina ezberdina izango da. Guztiek elkarrekin bazkaltzea ezinezkoa izango dela argi dute, Agirre Lehendakariaren plazan eta herriko kaleetan barrena ez da izango aurten kuadrilla marearik; bai, ordea, olatu txikiak han-hemenka, itsaso handi eta zabala, baina batez ere feminista, parte hartzailea, euskalduna eta ekologista osatzeko, bakoitzak bere txokotik egingo baitio ekarpena hain garrantzitsua den hitzorduari.
Hori deia, bakoitzak bere txokotik U23 berriro ere kolorez janztea eta horretarako prest du OaingozHau mugimenduak aurtengo kuadrilla egunerako kamiseta. Interesdunek eskaera egin beharko dute ostegunean —hilak 11—, ostiralean —hilak, 12— 18:00etatik 20:00etara edo larunbatean — hilak 13— 11:00etatik 13:00etara, Zumardian. Kamisetaren salneurria, 10 euro.
