Sanpedrotarra FEko areto futbol taldean izena ematera deitu dute
Bajak eta lesioak direla eta, jokalari berriak behar ditu klubak. Helburua aurtengo blokea mantendu eta jokalari berriak gehitzea da, taldearen etorkizuna bermatzeko.
Sanpedrotarra FEko taldearen artxibo irudia. Talde horrek bigarren postua lortu zuen aurtengo Gipuzkoako Kopan. Ohiko bukaerarik izan ez badu ere, denboraldi aparta burutu du Sanpedrotarra Futbol Elkarteak Gipuzkoako Emakumezkoen Areto Futbol Ligan. Koronabirusa iritsi zela, bigarren postuan ziren moreak 34 punturekin. Gipuzkoako Kopan egindako lanagatik ere saria jaso zuten urtarrilean, bertan ere bigarrenak izan ziren.
Dena den, denboraldi arrakastatsu hau bukatu dutela, orain datorren denboraldiko egitura dute helburu Sanpedrotarran, “jokalariak behar ditugu hainbat postuetan, atezainak ere”, adierazi du Itziar Anza kapitainak. Lanarekin bateratu ezinik hainbat jokalarik taldea utzi behar izan dute eta berriak iritsi ezean, datorren denboraldia kolokan egon liteke. Aparteko baldintzarik ez dute eskatzen, nahikoa dira “gogoa eta konpromisoa”. Interesdunek Alex, taldeko koordinatzailearekin jarri beharko dira harremanetan, 673 590 480 telefono zenbakira deituta.
Sanpedrotarran, talde beteranoa izan arren, gazteak ere ongi etorriak direla dio Anzak: “18-20 urtetik aurrerako neskak etor daitezela lasai”. Oraingoz ez dakite zehazki, “noiz eta nola” hasiko den 2020/2021 denboraldia, baina asmoa, aurredenboraldia irailean egitea dela azaldu du Sanpedrotarrako jokalariak, “aurredenboraldiak iraun bitartean astean hiru entrenamendu egiten ditugu astean zehar”.
Lehiaketei ekin aurreko tarte hori izango dute jokalari berriek taldeari neurria hartzeko. Aurreko urteetako egutegiari eusten bazaio, urrian hasiko litzateke Gipuzkoako Liga. Ordutik aurrera bi entrenamendu egingo dira astero Donibaneko kiroldegian eta asteburuetan partidak jokatuko dira.
Helburua blokeari eutsi eta jokalari berriak gehitzea bada ere, Itziar Anzak ohartarazi du une honetan ez direla nahikoak taldea mantentzeko “5-6 jokalari ditugu oraintxe bertan. Hain gutxi izanda ezinezkoa izango da aurrera egitea. Lasai egoteko denboraldian, 13 jokalari-edo beharko genituzke”. Ez da gutxi talde moreak eskainitakoa; Gipuzkoako talde onenetako batean jokatzeaz gain, “jokalarien arteko giro ona eta sanpedrotarren babesa” ziurtatu ditu Itziar Anza kapitainak.
