Gaztedi Txikiren udalekuetan izena eman daiteke
Honakoa Gaztedi Txiki elkartearen eskaintza: zazpi egunez lagunekin gozatzeko aukera. Adin tarte bakoitzeko txanda ezberdinak antolatu dituzte.
Larraulen egingo du kanpalekua Gaztedi Txikik. Urtero antolatzen duen kanpamendua ezingo du egin aurten Gaztedi Txiki aisialdi elkarteak, baina aisialdi elkarteko begiraleak buru-belarri aritu dira lanean alternatibak bilatzeko. Argi dute, COVID-19ak eragin duen egungo normalitate berrian, haur zein gazteek dituzten beharrak asetzen ez direla, “haientzat sozializatzeak duen garrantziaz jabetuta eta hori bermatzeko antolatu dugu eskaintza”.
Egoera berezi honetan, segurtasun neurriak bete daitezela ezinbestekoa dela eta, lan handia egin dutela baldintza horiek guztiak ezin hobe beteko direla ziurtatzeko erantsi dute.
Honakoa Gaztedi Txiki elkartearen eskaintza: zazpi egunez lagunekin Larraul herrian gozatzeko aukera. Adin tarte bakoitzeko txanda ezberdinak antolatu dituzte. Oarsoaldeko haur eta gazte guztiei irekia da eskaintza, baina lehentasuna izango dute urtean zehar Gaztedi Txikiko ekintzetan parte hartzen dutenek, eta Errenteria-Oreretan bizi direnek.
Izena ematea zabalik dago jada eta hilaren 16ra arte izango da izena emateko aukera. Prezioa, berriz, 275 eurokoa da.
Garraioari dagokionean, gurasoen kontu izango da. Egungo egoera dela eta, guraso bakoitzak eraman beharko ditu eta gero jaso seme-alabak Larrauleko aterpetxetik. Iristeko ordua, 10:00etatik 11:00ak arte izango da, eta egonaldia amitutakoan jasotzekoa, berriz, 12:00etatik eta 13:30era arte. Izena eman eta informazio gehiago eskuratzeko sakatu hemen.
Osasun egoeran aldaketarik balego, bertan behera geldituko dela kanpalekua jakinarazi du Gaztedi Txikik.
Sei txanda antolatu dituzte, hemen zehatz azalduta:
- Lehenengo txanda: 2008-2009an jaioak, ekainaren 28tik uztailaren 4ara bitartean.
- Bigarren txanda: 2005-2007 artean jaioak, uztailaren 5etik 11ra.
- Hirugarren txanda: 2008-2009an jaioak, uztailaren 12tik 18ra.
- Laugarren txanda: 2010-2011n jaioak, uztailaren 26tik abuztuaren 4ra.
- Bosgarren txanda: 2005-2007 artean jaioak, abuztuaren 2tik 8ra.
- Seigarren txanda: 2008-2009an jaioak, abuztuaren 9tik 15era.
