Irakurketa gela zabalduko du bibliotekak
Orain arte egindako online ekintzak modu presentzialean eskainiko dituzte. Partaide kopurua eta edukiaren arabera aukeratu eta egokituko da aretoa horretarako.
Hilaren 15etik aurrera, datorren astelehena, zerbitzu gehiago eskainiko ditu bibliotekak. Zehazki, helduen irakurketa gela zabalduko dute berriz ere. Bestalde, orain arte egindako online ekintzak modu presentzialean eskainiko dituzte. Partaide kopurua eta edukiaren arabera aukeratu eta egokituko da aretoa horretarako. Parte hartu nahi dutenei bibliotekarekin harremanetan jartzeko eskatu diete.
Helduen bibliotekan aurrez aurreko ordutegia 10_:00etatik 18:00etara izango da. Mailegu zerbitzuan, orain arte bezala, zortzi pertsona onartuko dituzte gehienez eta 15 minutu izango dituzte liburuak aukeratzeko. Erabiltzaileak banaka joan behar dute, gainera, menpekotasunen bat dutenek salbu.
Irakurketa gelan gehienez 22 lagun onartuko dituzte aldi berean, eta ez da denbora mugarik egongo.
Datorren astean, gainera, helduei begira bi ekintza antolatu dituzte: hilaren 15ean, astelehena, euskarazko literatur solasaldia gidatuko du Xabier Etxaniz idazleak 19:00etan hasita. Sergei Dovlatov idazlearen Maleta liburua izango dute hizpide. Bigarren hitzordua, hilaren 17an, asteazkenarekin izango da., English book club Slawka Grabowskarekin. Harpe Leeren To kill a Mockingbird liburua izango dute hizpide.
Haurren biblioteka
Haurren bibliotekan 10:00etatik 13:00etara izango da arreta ordutegia. Orain arte bezala, zorti pertsona onartuko dituzte gehienez mailegu zerbitzuan eta 15 minutu izango dituzte liburuak aukeratzeko. Erabiltzaileak banaka joan behar dute, 8 urtetik beherakoak edo menpekotasunen at dutenak salbu.
Orain arte bezala, telefono bidezko zerbitzua zein telematikoa eskaintzen jarraituko duela gogorarazi du halaber bibliotekak, 08:00etatik 20:30era ondoko bideetatik: 943 449 635 telefono zenbakia, posta elektronikoa, eta whatsappak bidaltzeko 647 673 451 telefono zenbakia dituzte eskura erabiltzaileek.
