[Erreportajea] Presoak etxeratzeko bidean ere jarriko dira errenteriarrak
Izan Bidea dinamika jendaurrean aurkeztuko dute hilaren 20an. Presoak etxeratzeko dinamika Mikel Arrieta larri gaixo dagoen herriko presoaren aldeko kanpainarekin uztartuko dute.
Mikel Arrieta etxeratzea eskatzeko bideoa egiten ari da Sare. Euskal presoen aldeko Izan Bidea dinamikaren berri emango du Errenteria-Oreretako Sarek hilaren 20ean, Lehendakari Agirre plazan (12:00). Iniziatibaren nondik norakoak jendaurrean aurkezteko hitzordua izango da hurrengo asteko larunbatekoa, eta herriko zenbait mendizaleren, txirrindulariren edota arraunlariren parte hartzea aurreikusi dute Sareko kideek, ekitaldiari «kolore pixka bat» emateko helburuarekin.
Dinamikaren nondik norakoak herritarrei azaltzea da helburu nagusia, edizio hau itxi bitartean ez baitzegoen erabakita kilometroren bat egitea eskatuko ote zieten aurkezpeneko parte hartzaileei. Nik Salatzen Dut eta Orain Bidea dinamiken ildo beretik datorrela Izan Bidea kontatu du Josu Galarraga Errenteria-Oreretako Sareko kideak. Aurretik garatutako dinamiken bitartez «aurrerapausoak» ematen joan direla ziur agertu da, baina oraingo honetan epe luzera begirako lana egin nahi dutela adierazi du, bi urteko kanpaina izango baita Izan Bidea. «Presoak etxera ekartzeko bidean jarri nahi ditugu dinamika honetan, konponbidearen bidean, elkarrizketaren bidean eta bakearen bidean, eta horretarako, gizarteari ere eskatu nahi diogu jartzeko bidean», adierazi du Galarragak.
Norbera bere eremutik apustu egitera eta bidean jartzera gonbidatu ditu Galarragak errenteriarrak, eta pixkanaka, hiru milioitik gorako kilometro kopuruaren marka haustera.
Nahieran
Kilometroak edozein modutan egin daitezkeela gogorarazi du Galagarrak: «Mendian, bizikletan, piraguan edo eskalatzen, ez du inporta». Bi urteko dinamika denez, hala ere, denborarekin ez direla soilik kilometro fisikoak izango argitu du kideak, eta «aukerak gehitzen» joango direla zehaztu du, baina horretarako «imaginazioa» lantzeko eskatuko zaie herritarrei. Esaterako, liburutegiko irakurketa tailerreko parte hartzaileek liburu bakoitza kilometro baten truke aldatzea posible izango dela hemendik hilabete batzuetara aipatu du. «Horrelako gauzatxoak ere egin daitezke, beraz, imaginazio puntu bat izatea eskatuko diegu herritarrei», erantsi du: «Euskal presoak etxeratzeko bidean edota giza eskubideen alde baldin bada, aukera ugari baliatu ahal izango dira parte hartu nahi duten lagunentzat».
Gaixotasun larriei ere, sua
San Joan sua baliatu nahi du Errenteria-Oreretako Sarek Mikel Arrieta larri gaixo dagoen herriko presoaren egoera salatzeko, eta batez ere, haren kasua jendartean ezagutarazteko. Bideo bat osatzen ari dira horretarako, eta bertan, euskal presoen egoera islatzen duten hitzak edo esaldiak sutara botako dituzte: «Dispertsioa, kondena hirukoitza, senideekin komunikazio falta… Mezu horiek guztiak bideoaren bukaeran erretzea gustatuko litzaiguke. Preso gaixoen eta Mikelen inguruan erre nahiko genituzkeen gauzak agertuko dira».
Oier Guillanek off ahotsa beteko du, bideorako sortutako «ekarpen propioarekin». Hala, hilaren 23an, San Joan bezperarekin, plazaratuko dute bideoa, eta modu horretan, bi dinamikak uztartuko dituztela aditzera eman du Galarragak.
