Pasaian udalekuak bai, baina soilik Lehen Hezkuntzako haurrentzat
Foru aldundiaren protokolo berriak aintzat hartuta, udalekuak bertan behera uzteko erabakia atzera bota du Pasaiako Udalak. Lehen deialdian izena eman zuten familiekin harremanetan jarri dira jada.
Aurtengo udalekuak LH 1 eta 5 arteko haurrei zuzenduak izango dira besterik ez. Udalekuak egingo dira Pasaian. Aurten baina, Lehen Hezkuntzako 1. eta 5. maila bitarteko haurrek parte hartu ahalko dute besterik ez. Aisialdi hezitzailean sor daitezkeen konplexutasun teknikoak direla eta, Haur Hezkuntzako haurrak hartzeko baldintzak ez direla ematen jakinarazi du Pasaiako Udalaren Haur Gazte eta Nerabeen Sustapen Sailak. Hortaz, LHko haurrei baino ez daude zuzenduak aurtengo udalekuak.
EUDEL Euskadiko Udalerrien Elkartearen gomendioari jarraiki, udaleku irekiak bertan behera utzi zituen maiatzaren 18an Pasaiako Udalak. Ez zen berezitasuna izan, inguruko udal eta erakunde gehienek bide berbera hartu baitzuten. Dena den, egoerak hobera egin du azken asteetan. Eusko Jaurlaritzak hilaren 7an publikatutako dekretua eta Gipuzkoako Foru Aldundiaren protokolo berriak aintzat hartuta, erabakia irauli eta udalekuak antolatuko ditu udalak.
Lehen deialdirako izena emanda zeuden haurrek parte hartu ahalko dute udalekuetan. Egoera berria denez, Haur, Gazte eta Nerabeen Sustapen Sailetik dagoeneko formulario bat helarazi diete familiei, oraindik ere parte hartzeko prest dauden jakiteko. Hala balitz, berehala onartuak izango lirateke. Antolatzeko denbora gutxi dutenez, formularioak ahalik eta bizkorren bidaltzea eskatu dute saileko teknikariek. Izena emateko epea hilaren 15ean amaituko da 12:00etan. Parte hartu nahi ez izatekotan, matrikularen diru kopuru osoa itzuliko zaie familiei. Izena emanda zeuden HHko haurren familiei ere, matrikula osoa itzuliko diete.
Urtxintxa (udalekuak antolatzen dituen enpresak) parte hartzeko interesa agertzen duten familiekin harremanetan jarriko da, xehetasun guztiak emateko: sinatu beharreko legezko segurtasun-protokoloak, talde bakoitzak sartzeko eta irteteko izango dituen ordutegi mailakatuak etab. Dena dela, Pasaiako Udalak segurtasuna uneoro bermatuko duela ziurtatu du.
Aurtengo udalekuetako ekintza guztiak Pasaiako mugen barruan egingo dira. Beti bezala, izaera ludikokoak izango dira eta arreta berezia emango zaie emozioen kudeaketari eta euskararen erabilera indartzeari.
