"Gastu militarrak behar sozialetara"
"Gastu militarrak behar sozialetara". Ideia hori aldarrikatzeko eta militarrek Jaizkibel mendian tokirik ez dutela esateko martxa egin zuten atzo.
Martxan izan zirenak, eremu militarraren parean. Jaizkibelgo eremu militarrera bosgarren martxa egin zuten atzo, militarrik gabeko mendia eskatzeko, eta gastu militarrak gizartearen beharretara zuzentzea aldarrikatzeko. 100 bat lagun elkartu ziren bertara. Eskualdeko herritar eta eragileen, nahiz Euskal Herriko talde antimilitaristen babesa jaso zuen mobilizazioak.
Gurutze Santuaren plazatik abiatu zen martxa. Handik Iparragirreko barrakoien aztarnetara joan ziren partaideak. Han, Etxetxo Lezoko Memoria Historikoaren Taldeko kide batek azaldu zuen 1936ko gerraren ostean frankistek 4.000 preso izan zituztela bertan, eta besteak beste, Jaizkibelgo errepidea eraikitzeko erabili zituztela, esklabotza egoeran, preso horiek. Garai hartan jabetu ziren militarrak mendiaren 364 hektareaz; mendiaren %17a, Pasaiako udalerriaren heren bat.
Ondoren, eremu militarrera joan ziren. Bertan talde antimilitaristetako kide batek azaldu zuen azken urtean Espainiako Estatuak 20.000 milioi euro gastatu dituela armagintzan, “gizartearen beharretarako dirurik ez dagoela dioten bitartean: osasungintza, hezkuntza, pentsioak, kultura, euskara, pobreziaren kontrako borroka, bertako nekazaritza edo natura zaintzeko…”. Adibide praktikoak ere eman zituen: tanke batek balio duenarekin sei ikastetxe eraiki daitezke; hegazkin militar baten kostuarekin bi ospitale egin daitezke; itsaspeko ontzi batek balio duenarekin, 62.000 erizainen soldatak ordain daitezke. Euskal Herrian dagoen industria militarraren, eta horrek jasotzen duen diru laguntzen berri ere eman zuten.
Frankismoaren oinordekotza den eremu militarrak sortzen dituen arazoez hitz egiteko ere baliatu zuten mobilizazioa, bai herrietako biztanleei zein mendiaren erabiltzaileei. Izan ere, mendia Europako Natura 2000 sarearen barruan dago: “Ingurumenaren babesarekin talka egiten du eremuak, eta leherketa, kutsadura, sute eta istripu ugariren eragile izan da”.
Eremuan bertan egin zen bilkuran nabarmendu zituzten, aldi berean, diru publikoarekin finantzatzen ari diren beste egitasmo, “amalurra kaltetzen dutenak”. Horien artean Aiako Harria parke naturalaren alboan, Nafarroako aldean, eraiki nahi den parke eolikoa aipatu zuten, baita abiadura handiko trena ere.
