Ezohiko madalenetarako ekarpenak eskatu dizkiete haurrei
Elkarren ondoan, fisikoki ez, baina familien laguntza baliatuta aurten ere haurren jai batzordea antolatuko duela iragarri du OarsoIrriakek.
Txupinazo txikiak gainezka egin zuen Koldo Mitxelena plazan. COVID-19ak hankaz gora jarri du egunerokoa, eta “normaltasun berrian” murgildu berri bagara ere, segurtasun neurriak betetzen jarraitu beharra dago eta arduraz jokatzen. Horren jakitun da OarsoIrriak iniziatiba; oinarrizkoa du bere izaeran zaintza erdigunean jartzea, eta kontziente eta koherente jokatuko du horrenbestez, bere printzipioekin.
Jakin badakite, aurtengo madalenak bereziak izango direla; arraroak, ezberdinak, ez ohikoak. Badakite ezingo dutela kalea hartu mila koloretako txupinazoarekin, ezta aurretik batzar interesgarrietan elkartu haurren ametsetako jaiak marrazteko. Elkarren ondoan, fisikoki ez, baina familien laguntza baliatuta aurten ere haurren jai batzordea antolatuko duela iragarri du OarsoIrriakek.
Zehazki, galdera sorta prestatu du iniziatibak, etxean goxo pentsatu, marraztu, irudikatu, antzeztu eta beraiei helarazteko ondoren. Galderak erantzuteko garian kontuan izan beharreko kontua: kalean ezingo dira elkartu aurten jaiak ospatzeko. Hona bost galderak: Egoera honetan, madalenetan zein ekintza edo ekintzak antolatzea gustatuko litzaizuke? ekintza hori egoteko zer egin beharko litzateke? Madalenetan zer egitea gustatuko litzaizuke? Zerbait ikustea gustatuko litzaizuke? Bestelako ekarpenik ba al duzu?
Horiek erantzunda edo ekarpenak eginda, hilaren 25a baino lehen helarazi behar dituzte posta elektronikoz eta jai batzorde orokorrera eramango dituzte bildutako ideiak, “egoera berezia kontuan hartuta, ahal duguna egingo dugu”. Etxean egindako jai batzordeen aregazkiak edo marrazkiak konpartitu nahi izanez gero, helarazteko eskatu dute.
Girotzen hasteko, Irria Harro kantaren bideoa zabaldu du OarsoIrriak iniziatibak.
