[Bideoa eta galeria] Ortzadarrari keinuka San Pedron
Ortzadarrari keinuka ibili dira gaur San Pedron. Kolorez bete dute berriz ere barrutiko asfaltoa, eta alkateordetzan LGTBI+ bandera erraldoia jarri dute.
Bihar da, ekainak 28, LGTBI+ Komunitatearen Nazioarteko Eguna, Harrotasunaren Eguna. Horri begira, San Pedron berriz ere ekin diote bertako asfaltoa ortzadarraren koloreekin margotzeari, komunitatearen ikurra barrutiaren erdi-erdian berriz ere koloreztatzeari. Hamarnaka herritar bildu dira gaurko ekitaldira, eguraldi ona lagun, giro ederrean. Ortzadarrari beste keinu bat egin diote San Pedron.
Margoketarekin adierazi nahi izan dute norberaren erabakia dela bere izaera eta sexu identitatea garatu, eta horren arabera bizitzea. Aske gainera.
Izan ere, San Pedron festetan izan behar ziren egunotan, eta bertan izaten den ekitaldirik nabarmenetakoa LGTBI+ bandera alkateordetzaren gorenean jartzea izaten da; aurten ere hori egin dute. Ez nahi bezala koronabirusaren eraginez, baina ortzadar bandera erraldoi bat dago jarrita alkateordetzaren balkoi nagusian.
Ondoko bideoa Ignatius EGk HITZAri utzitakoa da.
