Euskara erruz eta denen eskura
Eskaintza egoera berrira moldatu behar izan dute eta segurtasun tarte eta protokolo guztiak behar bezala bete ahal izateko ikasgeletako aforoa murriztu egin dute. Ikastaro aukera baina, urtero bezain zabala izango da.
Errenteria-Oreretako euskaltegietan zabalik dago matrikula epea. Eskaintza egoera berrira moldatu behar izan dute eta segurtasun tarte eta protokolo guztiak behar bezala bete ahal izateko ikasgeletako aforoa murriztu egin dute. Ikastaro aukera baina, urtero bezain zabala izango da, A1, A2,B1,B2,C1 eta C2 tituluak landu eta lortzeko taldeak egingo dituzte eta astean 20, 15, 10 eta 5 orduko ikastaroak daude aukeran.
Ordutegi aukera ere zabala da: goiz, eguerdi eta arratsalde. Autoikasketa, trebetasunak landu eta erabilera bultzatzeko taldeak ere sortuko dituzte. Lehentasuna eskolak aurrez aurre ematea da; hala ere, modulu mistoak eta urrutiko irakaskuntza ere eskainiko dituzte.
Diru laguntzak
Xenpelar AEK eta Udal euskaltegian euskara ikastea sustatzen du udalak, eta horretarako diru laguntza lerro zabala dago herritarren eskura, euskara ikasteak arazo ekonomiko suposa ez dezan. Hala, udal euskaltegian, langabetuek eta lanbidearteko gutxieneko soldata baina txikiagoa dutenek, matrikula doan izango dute. Bestalde, hobaria izango dute gurasoek, familia ugariko kideek, eta etxe bereko bigarren ikasleak.
AEKn egoki baloratu dituzte laguntza lerroak: “Helburua euskara ikastea doakoa izatea da, eta nabaria da udala lanean ari dela norabide horretan. Langabetuek doan dituzte eskolak, eta gurasoek matrikularen %20 soilik ordaintzen dute. Ekonomia arazoak ezin dute bertako hizkuntza ikasteko oztopo izan, eta ari gara pausuak ematen”.
Udal euskaltegian hilaren 25era arte dago zabalik izena emateko epea, eta hilaren 28an abiatuko dituzte eskolak; Xenpelar AEKn hilaren 30a da izena emateko azken eguna eta urriaren 1ean abiatuko dute ikasturtea.
