'Zaharrak berri', adinekoei begirako emanaldia ondu du EMKEk
Egungo egoera soziosanitarioa eta indarrean dagoen araudia kontuan hartuta, bertaratzeko nahitaezkoa izango da gonbidapenak jasotzea aurretik. Hilaren 17an (osteguna) hasiko dira banatzen Niessen Kulturguneko leihatilan.
Koldo Mitxelenako jolastokian Musika Bandak emandako kontzertu bat. Bere musika emanaldiekin bazterrak aberasten ditu EMKE Musika Bandak. Txoko eta arlo guztietara zabaldu nahi ditu doinuak, eta bide horretan beti eskaintzen die tarte berezia Errenteria-Oreretako adinekoei ere. COVID-19aren osasun larrialdiak zaildu eta kasu askotan bertan behera utzarazi ditu emanaldi horietako asko, edo presentzialak zirenak, online emanaldi bihurtu. Asteburu honetan, baina, bandaren doinuak zuzen zuzenean, bertatik bertara entzuteko parada izango dute herriko adinekoek beraientzako berariaz antolatutako Zaharrak berri emanaldiaren bidez.
Kontzertu hori Gabierrota auzoan kokatuta dagoen Jesusen Bihotzaren adinekoen egoitzan egin behar zuen EMKEk; osasun egoerak baina, ez du horretarako aukerarik eman —agerraldia izan da adinekoen egoitza horretan, eta COVID-19ak kutsatutako 16 egoiliar dira une honetan—. Horren ordez, Koldo Mitxelena ikastetxeko jolastoki estalira lekualdatu du emanaldia musika bandak.
Hilaren 20an, igandea, izango da emanaldia, 12:30ean hasita. Egungo egoera soziosanitarioa eta indarrean dagoen araudia kontuan hartuta, bertaratzeko nahitaezkoa izango da gonbidapenak jasotzea aurretik. Hilaren 17an (osteguna) hasiko dira banatzen Niessen Kulturguneko leihatilan.
Jai giroko egitaraua bildu dute emanaldira EMKE Musika Bandakoek, eta besteak beste, pandemiak eraginda bertan behera geratu diren Euskal Herriko jaietako doinuak joko dituzte: Iruñeko, Baionako, Donostiako, Bilboko eta Gasteizko doinuetan zehar musika bidaia egingo dute Alain Aierdik zuzenduta.
Ikasturteko bigarren zatiari hasiera emateko lehen kontzertua izango da igandekoa; hortik aurrera egitarau zabala du prest musika bandak. Hilabete amaieran, denboraldiaren bigarren zati bereziaren berri emateko agerraldia egingo duela iragarri du EMKEk: “Lauhilekoa, errealitate berrira egokitutako kontzertuz, formatuz eta proposamenez beteta datorkigu. Denboraldi ezberdina izango da, inflexio puntua gure Errenteriako Musika Bandaren ibilbide luzean —156 urte bete ditu—. Erronka handia, duela 10 urte zabaldutako proposamen eszeniko berrien egokitzapen eta esploratze prozesua garatzen jarraitzeko”.
