81 etxebizitza eraikiko dituzte Esnabiden, bi heren, babes ofizialekoak
Udalaren esanetan, antolamendu hori gauzatzea aukera bat da udal etxebizitza politika arloan, babes ofizialako etxeen artetik 27 udalaren titulartasunekoak izango direlako. Gainera 2006az geroztik onartutako eta indarrean dagoen plangintzaren barruan, eragileekin adostutako hobekuntzak txertatu dituztela jakinarazi du udalak.
Esnabide urbanizatzeko lanak hasi dituzte. Eremu horretan 81 etxebizitza eraikiko dituzte, eta horietatik bi heren, babes ofizialekoak izango dira. Udalaren esanetan, antolamendu hori gauzatzea aukera bat da udal etxebizitza politika arloan, babes ofizialako etxeen artetik 27 udalaren titulartasunekoak izango direlako. Gainera 2006az geroztik onartutako eta indarrean dagoen plangintzaren barruan, eragileekin adostutako hobekuntzak txertatu dituztela jakinarazi du udalak.
Esnabide 32 sektoreko plan partziala 2006ko otsailaren 10ean onartu zen behin betiko udalbatzarrean, eta ondoren, urbanizazio proiektua. Krisi ekonomikoak proiektuaren garapena gelditu zuen, baina duela gutxi beste promotore batek heldu dio berriro udaletik azaldu dutenez. 2020an Xehetasun Azterlana tramitatu zuen udalak, otsailean zehazki, hiru etxebizitza blokeen orientazioa hobetze aldera, “inpaktu bisuala murriztuz eta lur mugimendua minimizatuz. Halaber, herriko hainbat eragilerekin hobekuntzak adostu dira antolamenduan, betiere indarrean dagoen urbanizazio proiektuaren barruan”.
Proiektua hobekuntzekin jarri dutela martxan ere esan du udalak eta horien gaineko zehaztasunak eman: “Berdegune publiko zabalagoak egingo dira, aparkaleku kopurua handituko, gaur egun erabiltzen ez den kirol eremua hobetzea eta indartzea, Don Boscoko biderako sarbidea hobetzea eta Esnabide baserria hobeto integratzea”.
Eguzkik eta Beraun, Galtzaraborda, eta Kaputxinoak auzoetako 180 bizilagunek alegazioa aurkeztu zuten ekainaren 19an Esnabideko Xehetasun Azterlana onartzeko espedientean. Halaber, lanak udal lizentziarik gabe egiten ari zirela eremu horretan salatu zuen talde ekologistak, baita hainbat txoriren habitata suntsitu dutela ere.
