Adingabeko bat atxilotu dute Trintxerpen, kuter batekin lapurtzen saiatzeagatik
Atzoko gauean adin txikiko bat atxilotu zuen Udaltzaingoak Euskadi etorbideko establezimendu batean lapurtzen saiatu ondoren. Azken egunotan bi trafiko delitu, eraso bat eta ebasketa ahalegina ere atzeman dira herrian.
Kuterra eskuan zuela sartu zen adingabekoa Trintxerpeko establezimendura. 
Pasaiako Udaltzaingoak iragarri du atzoko gauean (asteazkena), 21:45a inguruan, adingabeko bat atxilotu zutela Trintxerpen, bertako establezimendu batean kuter batekin lapurtzen saiatu izanagatik. Lapurreta saiakera Euskadi etorbideko establezimendu batean jazo zen; antza denez, adin txikikoa lokalean sartu zen kuterra eskuetan zuela, jabea han zegoelarik. Hori ikusita, bertan zegoen gizon batek lapurra lurrean ibilgetu zuen, saiakera armatua galaraziz. Udaltzaingoa gertatutakoaz ohartarazi eta eurek atxilotu zuten ustezko lapurra, erabilitako arma zuria kendu eta Ertzaintzaren bulegora eramanez eginbideak gauzatu ostean.
Gertakari horren ildotik, Udaltzaingoak azken egunotan udalerrian izandako lau argibideren berri ere eman nahi izan du: Bi lagun inputatuak izan dira trafiko segurtasunaren aurkako ustezko delituengatik (alkoholaren eraginpean gidatzeagatik); haietako batek legeak onartzen duen alkohol tasa bikoiztu zuela nabarmendu dute. Horiez gain, beste pertsona bat atzeman zuten ustezko erasoengatik, eta azkena, asteartean, Pasai Antxoko banku bulego batean ustezko ebasketa ahaleginagatik.
