'Bi urte, lau hilabete eta egun bat', etxean
Astearteko saioan Lander Garro zuzendaria ariko da aurkezpen saioa zein ondorengo solasaldia egiten. Ozzinemak antolatu duen emanaldia filmaren estreinaldia izango da zuzendariaren jaioterrian.
Berri ona Ozzinema Zineklubak eman duena: hilabete honetan, astero emango du film berezi eta interesgarria, eta beraz, zinemazaleek asteartero izango dute historia eta istorio handiekin gozatzeko aukera. Hileko lehen proposamena etxera begira egin du, eta Errenteria-Oreretako Lander Garro zuzendariaren Bi urte, lau hilabete eta egun bat dokumentala emango du hilaren 6an, asteartea.
Espetxetik atera eta urte batzuetara, Iruñeko kartzelara itzuliko da preso ohi bat eraitsi behar dutenean. Presoa ziegan dagoela negarrez hasi da. Bertan eman zituen preso bere bizitzako bi urte eta lau hilabete intsumisoa izateagatik.
Irudi horretatik abiatuta derrigorrezko zerbitzu militarraren kontrako 1990. hamarkadako mugimendura hurbildu da zuzendaria, eta hausnarketa zabaltzeko, azterketa politikoa, soziala eta intimoa egin du zuzendari oreretarrak.
Soldadutzaren aurkako mugimenduaren kronika da film luze hori Garroren hitzetan, borroka molde baten lekukotza, eta horrek etorkizunean izan dezakeen eragina erronka berriei aurre egiteko garaian aldarrikatu du.
Dokumental politikoa da Garrorena, eta oinarrian sei protagonisten elkarbizitza du.
Astearteko saioan Lander Garro zuzendaria ariko da aurkezpen saioa zein ondorengo solasaldia egiten. Ozzinemak antolatu duen emanaldia filmaren estreinaldia izango da zuzendariaren jaioterrian. Urriaren 9tik aurrera, Niessen zinemetan emanaldi gehiago izango dira. Luxua herriarentzat zuzendari oreretarraren lana ikusi eta horrekin batera Garro bera lehen eskutik entzuteko aukera izatea.
Garroren lana, garai bat ulertu eta borroka eredugarri bat gogoratzeko bizi zutenen kasuan, eta ezagutzeko jaio gabe ziren belaunaldi berrientzat, ezinbestekoa da. Borroka horrek dokumentalaren protagonisten bizitzak markatu zituen, baina baita herri oso batenak ere. Emanaldia asteartean izango da —hilak 6— 19:30ean Niessen Zinemetan, eta sarrerak Niessen kulturgunean daude salgai 4 euroan. Osasun larrialdiaren harira ezarritako osasun eta segurtasun neurriak bermatuko dira.
