Errimak josten jarraituko dute
Ikasturte berria datorren astean hasiko dute. Izena eman nahi dutenek 646 610 034 telefono zenbakira deitu behar dute
Xenpelar Sariko finaleko artxiboko argazki bat. Ziurgabetasun garaia izan da honakoa ere Xenpelar Bertso Eskolarentzat, baina normaltasun berriaren testuinguruan prest du ikasturte berria. Martxotik hona ekitaldi sorta ez nolanahikoa utzi behar izan dute bertsozale, bertsolari eta hitzekin jolasean trebatzen hasi berri direnek, baina gogotsu datoz ateak parez pare zabalduta bertsolaritzarekin gozatu nahi duen ororentzat.
Pasa den ikasturtean izandako parte hartzea nabarmendu dute arduradunek, “90 haur aritu ziren bertso eskolan, hamar taldetan banatuta”. Saioak ere, eskola bezala, emankor pandemiak dena hankaz gora jarri zuen arte; urrian hasita, hilabetero Arka Hitzak iniziatibaren barruan plazan jarduteko hainbeste aukera ez duten entzuteko aukera paregabea eskaini du Xenpelar Bertso Eskolak. Ikasturte berrian, zoritxarrez, ezingo du momentuz behintzat halakorik egin.
Bestelako ekintzak ere biribil: Zapirain anaiak eta Ibon Zabala bertso paper lehiaketak, Urte zaharretako koplak, Santa Ageda… Bi urtean behin reintza elkartearekin batera antolatzen duten Xenpelar saria antolatzeko asmoa azaldu dute, “Ahal izanez gero, eutsi egin nahi diogu bertsolari gazteen txapelketari”.
Tarteka bat batean aritzen diren helduen bi talde ere badira bertso eskolan, haurrez gain, beraz, helduak ere animatu dituzte bertsotan aritzera.
Ikasturte berria datorren astean hasiko dute. Izena eman nahi dutenek 646 610 034 telefono zenbakira deitu behar dute. Xenpelarren itzalean, uztak ona izan behar du derrigorrean.
