Kulturaz gozatzeko deskontuak eskainiko zaizkie Pasaiako ikasleei
COVID-19aren ondorengo kultur programazioari bultzada bat emateko eta ekoizpenak gazteei hurbiltzeko laguntza lerro berria jarri du martxan aldundiak. Pasaiako zentroetara 233 kultur-bonu bidaliko dira.
Albaola Itsas Faktoria, Pasaiako museoetako bat. 
Gipuzkoako Foru Aldundiko Kultura Departamentuak 233 kultura-bonu bidali ditu Pasaiara arte eszenikoetan eta museoetan erabili daitezen. Laguntza lerro berri horrek sektorea suspertzea eta gazteen artean kulturarekiko interesa piztea du helburu, kultur ekoizpen eta ekintzak herritarrengana hurbilduz eta 6 euro arteko deskontua eskainiz ikuskizunetako sarrerak erosteko, eta 4 euro artekoa museoetara sartzeko. Bonuak trukatzeko epea hilaren 15etik urte amaierara artekoa izango da.
Bonuak Pasaia Lezo Lizeora (148) eta Pasaiako Itsas Arrantzarako Blas de Lezora (85) bidali dira, 16 eta 17 urte bitarteko gazteei zuzenduta. Harkaitz Millan Kultura diputatuak adierazi du Koronabirusari aurre egiteko ezinbestekoa dela kultur sektorea biziberritzea: “Kultura funtsezko ondasuna da, eta horren mende dago, neurri handi batean, gizarte gisa aurre egitea”.
