Altamirako parkea berritzeko laguntza jaso du Lezoko Udalak
Parkearen espazioaren egungo egoera aldatu eta hobetu nahi dute, zonaldearen balio eta ahalmenak baliatuz.
Altamirako parkea berritzeko laguntza jaso du Lezoko Udalak, Ingurumen eta Trantsizio Ekologiko Sailak jakinarazi duenez. Udalsarean 203o Proiektu Berritzaileak programara aurkeztu zen udala Altamira biziberritzeko egitasmoarekin, eta bertako puntuaziorik altuena jaso ondoren, parkea berritzeko urrats gehiago egingo dituzte.
IHOBEk (Eusko Jaurlaritzaren Ingurumen Hobekuntzarako erakundea) eta Udalsarea 2030ek (Udalerri Jasangarrien Euskal Sarea) bultzatutako diru laguntzaren xedea da klima aldaketarekiko arintze eta egokitzearekin, natura ondarea kontserbatzearekin eta hobetzearekin, ekonomia zirkularrarekin, hondakinen kudeaketarekin eta trantsizio ekologikoarekin harremana duten egitasmoak finantzatzea.
Hala, Altamiraren kasuan, bertako parkearen espazioaren egungo egoera aldatu eta hobetu nahi dute, parkearen balio eta ahalmenak baliatuz. Izan ere udalaren esanetan, Lezoko birika izan dadin lanean ari dira, “bai paseatzeko, bai naturarekin harremanetan egoteko ere. Lezoarrei eta Altamirako biztanleei bereziki erabilera anitzeko espazio berri bat eskaini nahi diegu”. Lezo 2030 Agendaren barruan dauden helburuen artean dago auzoko parkea biziberritzea.
Joxean Sanchez Ingurumen zinegotziaren arabera, laguntza jasotzea aitortza da gobernu taldearentzat, “Altamirako eremua hobetzeko dagoeneko gauzatzen ari den proiektuari babesa da”. Sortuko den espazioa segurua, inklusiboa eta erabat irisgarria izango dela adierazi dute udaletik, eta mugikortasun iraunkorra sustatuko duela, “belaunaldien arteko elkargunerako eta gozamenerako espazio bihurtuko da, eta horrez gain, klima aldaketari erreparatuz, tokiko mikroklima erregulatzen lagunduko du”. Gainera, udalaren ustez, COVID-19aren eraginak gertu dauden espazioekiko beharra azaldu du.
Egitasmoaren barruan, Altamirako egungo parkearen eremuari ondoan dagoen beste bat erantsiko liokete, 8.000 metro koadrokoa, egun erabilerarik gabe eta degradatua dagoena. Horrekin, herrigunera hurbilduko litzateke parkea. Gainera, 2021ean kota handiagoetara iristeko beste igogailu bat egitea aurreikusi du udalak, Bekoerrota-Altamirako berriaren osagarri gisara.
