Euskal Koparen bila doa Antxo AF
Antxo AF areto futbol taldeak Euskal Kopako lauko finalean parte hartuko du asteburuan. Eskoriatzan dira lehiak, eta zaleak, mugekin, joan daitezke.
Pescados Alberto Ferreres-Antxo AF areto futbol taldea. Areto futboleko Euskal Kopako lauko finalean parte hartuko du Pescados Alberto Ferreres-Antxo AF taldeak asteburuan. Lehenik eta behin finalerdietako partida jokatuko du bihar, 19:00etan, Otxarberen kontra. Partida hori irabaziz gero finala dute zain, etzi 18:00etan. Eskoriatzako kiroldegian jokatuko dituzte partida guztiak.
Lan nekeza izango da talde antxotarrak bere garaipenen zerrendara beste bat gehitzeko. Hasteko, finalerdietako kontrarioa ez da nolanahikoa. Otxarbe taldea (Otxarkoaga, Bilbo) Bigarren B Mailan dago, hau da, antxotarrak baino kategoria bat gorago. Beraz, onena eman eta akats gutxi egin beharko dituzte zuri-gorriek finalean sartzeko.
Beste finalerdiko taldeak Sasikoa eta Auzoak Zierbena dira. Lehena Antxo AFren maila berberekoa da (Hirugarren Maila), bigarrena Bigarren B Mailakoa.
Antxo AFk jakinarazi du partidetara ikusleak joan daitezkeela. Baina aforo muga du kiroldegiak. Hortaz, antxotarrak animatzera joan nahi dutenek izen-abizenak, NA eta telefono zenbakiak eman behar dizkiete taldekideei. Bidaia euren kabuz egin beharko dute zaleek.
