"Garai hauetan bereziki beharrezkoa da haurrekin eta helduekin elkarguneak sustatzea"
Aitziber Eguskiza Kultura eta Hezkuntzako teknikariak eta Artekaleko Joserra Fachadok aurkeztu dute Pasaiako Umorezko Antzerki Jardunaldien 39. edizioa: "Oso pozik gaude, kultura beharrezkoa delako".
Aitziber Eguskiza eta Joserra Fachado. 
Aitziber Eguskiza Kultura eta Hezkuntzako teknikariak eta Joserra Fachadok Artekaleko (Euskal Herriko Kale Arteen Elkartea) kideak aurkeztu dute Pasaiako Umorezko Antzerki Jardunaldien 39. edizioa. Aurtengo berrikuntza nabarmenetakoa da Pasaiako Udalak eta Artekalek, elkarlanean, antolatu dutela programa, bigarrenek hilaren 16, 17 ea 18an izango diren kale ikuskizunak nahiz formakuntza bat prestatu baitituzte.
Eguskizak aurtengo antzezlanak martxan direlako asetasuna adierazi du: “Oso pozik gaude hasieran kolokan izanda ere, lortu dugulako, kostata, 39. edizio honekin aurrera egitea, ez dela gutxi!” Jaialdi garrantzitsu asko erori dira eta pandemiaren ondorioz, baina Pasaian “gutxienezko egitaraua atera ahal izan dugu eta oso pozik gaude, oso beharrezkoa delako kultura”.
Teknikariak lehen asteburuko ikuskizunen errepasoa egin nahi izan du, pasaitarrak animatuz kalera ateratzera, Trintxerpen nahiz Antxon adin guztietarako izango diren lehen bi ikuskizunez gozatzera. Hilaren 18an (igandean) izango den ‘Kalma’ pieza bereziki nabarmendu du: “Ikusteko modukoa da, oso gozagarria”. Fachadok lehen antzezlanaren berri eman du, bera baita bi protagonistetako bat: “Tomaxen Abenturen pieza hau Donostian abuztuan estreinatu genuen, eta orain Pasaian egitea gustu bat da guretzat! Helburua da jendeak ongi pasatzea, umorea. Haurrentzat zuzenduta dago baina helduek ere oso ongi pasatzen dute, eta hori plusa da”
Bigarren asteburuari dagokionez, Donostia Antzerki Saria irabazi duen ATXren lana aspaldi Pasaiara ekarri nahi izan dutela adierazi du Eguskizak, eta aurten, azkenean, lortu izanak asko pozten dituela antolatzaileak. Horren ostean, “beti arrakastatsua den Markeliñe izango dugu, Kartoibiraka ikuskizunarekin. Pieza horrek badu bere ibilbidea eta nazioartean oso goraipatua da”, Fachadok bat egin du esandakoekin: “Oso polita da, merezi du ikustea. Ederra da, ez dira damutuko…”. Azkenarekin, Belen Cruz eta Mila Espigak umorez beteriko amaiera emango diote aurtengo egitarauari.
“Garai hauetan bereziki beharrezkoa da haurrekin eta helduekin elkarguneak bultzatzeko egitasmoak sustatzea”, esan du teknikariak. Ildo horretan, herritarrak animatu nahi izan ditu sarrerak lehenbailehen eskuratzera; dena den, argi utzi du ikuskizunak hasi baina ordubete lehenago leihatila bat irekiko dutela digitalki gonbidapenak eskuratzeko zailtasuna izan lezaketen horiek bertan eskura ditzaten. Emanaldi guztietan osasun eta segurtasun neurriak bermatuko direla nabarmendu dute antolatzaileek.
