[Galeria] Pilota egokituko finalak txiki utzi du Agustina Otaola frontoia
Adimen urritasun kategorian Leire Esnal Zumaiarra eta Eneko Sagarmendi errenteriarra nagusitu dira; elbarritasun fisiko kategorian berriz, Aingeru Senperenak eta Mikel Merinok jantzi zuten txapela.
Pilota egokituko txapelketa. Argazkia: Carrera Txiki utzi zuten pilotazaleek atzo Agustina Otaola pilotalekua. Bertan jokatu zen Pilota Egokituko Sari Nagusiaren finala bi kategoriatan: elbarritasun fisikoa eta adimen urritasuna. Partida bikainak izan ziren biak, jokaldi benetan ikusgarriak utzi zituzten gainera, elbarritasun fisikoko kategorian aritu ziren lau palistek pilotazaleen gozagarri. Fanderiako frontoiak ezin izan zituen hartu bertaratutako guztiak, eta pilotazale asko frontoi kanpoan gelditu ziren, COVID-19aren osasun larrialdiaren harira ezarritako protokoloak aforoa mugatzea ekarri baitu sariketa horretan ere.
Adimen elbarritasun kategorian Leire Esnal zumaiarra eta Eneko Sagarmendi errenteriarrak osatutako bikoteak lortu zuen garaipena. Errazetik lortu zuten garaipena Iñaki Divasson eta Xabier Arizkorretak osatutako bikotea 25-11 garaituta. Esnalek eta Sagarmendik iazko txapeldunak izan ziren, eta aurtengo txapelak, beren bidea sendotu duen zalantzarik ez da.
Lehiatuagoa izan zen partida elbarritasun fisikoaren kategorian; oreka eta emozioa partidaren azkeneraino ziurtatu zituzten lau palistek eta ikusgarri aritu. Aingeru Senperenak eta Mikel Merinok jantzi zuten txapeleketa nagusiko txapela Hilario Olano eta Beñat Lizaso 22-25 garaituta.
Pilota egokitua pixkanaka ari da bidea egiten agendan, eta horretarako ezinbestekoa da Pilota Egokituko Sari Nagusia bezalako txapelketak antolatzea. Finalaren aurkezpenean nabarmendu zuten moduan, jokatzeko plaza gutxi badira euskal pilotan, zailtasun hori areagotu egin da pilota egokituaren kasuan; hori finalak Errenteria-Oreretan jokatu zituen txapelketaren garrantzia.
Integrazioa eta pilota egokituaren sustatzaile nagusietako bat izan zen Mikel Izagirre errenteriarra. Mindara sortu eta presidente izan zen zendu zen arte, eta bertatik, integraziorako tresna gisa sustatu eta bultzatu zuen pilota egokitua. Atzoko final nagusiaren ostean, omenaldia eskaini zioten bildutakoek Izagirre zenari egindako lanarengatik, eta zabaldutako bidearengatik.
Ondoko galeriako argazkiak, Emakume Master Cup-ek helarazitakoak dira.
