Lander Garroren filma, hiru egunez etxean
Lander Garro zuzendari errenteriarraren Bi urte, lau hilabete eta egun bat filma Errenteria-Oreretan berriro ikusteko aukera izango da.
Bi urte, lau hilabete eta egun bat dokumentalaren kartela. Lander Garro zuzendari errenteriarraren Bi urte, lau hilabete eta egun bat filma Errenteria-Oreretan berriro ikusteko aukera izango da. Zehazki, hiru egunez emango dute intsumisioaren gainean Garrok egindako luzea Niessen aretoan. Horrenbestez, bihar, etzi eta ostegunean dute hitzordua filma ikusi nahi dutenek 19:40ean.
Espetxetik atera eta urte batzuetara, Iruñeko kartzelara itzuliko da preso ohi bat eraitsi behar dutenean. Presoa ziegan dagoela negarrez hasi da. Bertan eman zituen preso bere bizitzako bi urte eta lau hilabete intsumisoa izateagatik.
Irudi horretatik abiatuta derrigorrezko zerbitzu militarraren kontrako 1990. hamarkadako mugimendura hurbildu da zuzendaria, eta hausnarketa zabaltzeko, azterketa politikoa, soziala eta intimoa egin du zuzendari oreretarrak.
Soldadutzaren aurkako mugimenduaren kronika da film luze hori Garroren hitzetan, borroka molde baten lekukotza, eta horrek etorkizunean izan dezakeen eragina erronka berriei aurre egiteko garaian aldarrikatu du.
Dokumental politikoa da Garrorena, eta oinarrian sei protagonisten elkarbizitza du.
