Espainiako Itzuliak Errenteria-Oreretako zirkulazioari eragingo dio datorren asteartean
Lasterketaren lehen etapak herria zeharkatuko du hilaren 20an, eguerdian. Hainbat bide moztuta egongo dira eta garraio publikoari ere eragingo dio Itzuliak.
Datorren asteartean, (hilak 20) Espainiako Itzuliaren lehen etapa Errenteria-Oreretatik igaroko da; hori dela eta, aldaketak eta afekzioak egongo dira trafikoan nahiz garraio publikoan. Honakoa da lasterketa igarotzea aurreikusi den ordutegia:
- 13:15ean Lintzirinetik etorriko dira eta herria GI-636tik gurutzatuko dute.
- 13:24ean irtengo dira kirolariak, Pasai Antxora sartuz (GI-636tik).
Itzuliak ez du herriko erdigunean eraginik izango, GI-636tik egingo baitute bidea oso-osorik. Txirrindulariei bidea libre uzteko, honakoak dira zirkulazioan hartuko diren neurriak:
- 13:15a baino 40 bat minutu lehenago, Lartzabaletik GI-636ra doan sarbidea moztuta egongo da. Ez horrela zentrora dauden sarrerak eta irteerak (Arragua eta Nafarroako Hiribidea).
- 13:24 baino berrogei minutu lehenago Kaputxinoetako tunelaren aurrean eta Donostiako norabidean dagoen biribilgunetik GI-636ra irteten den bide zatia moztuta egongo da. Ibilgailuak Kaputxino gainera bideratuko dira.
Bestalde, eta gune batzuetan trafikoa mugatuta egongo den tartean (12:30etik 13:40era gutxi gorabehera), udalerriko sarrera irteerak bai Oiartzunera (Arraguatik), Irunera (Arragua eta Lezo-Gaintxurizketa), Donostiara (autobidetik), Astigarragara (Zamalbidetik), Lezora eta Donibanera (Lezo ibilbidetik –Altzateko biribilgunea), irekita egongo dira ustekaberik ezean.
Herri barneko garraioari dagokionez, Herribusek ohiko ibilbide eta ordutegiak mantenduko ditu, U22 Lartzabal-Morrongileta linean izan ezik. Azken hau Alabergatik (Nafarroako biribilgunea) Biteri kalera sartuko da, eta Sorgintxulo, Versalles, eta Galtzarabordako geltokiak bertan behera geratuko dira. Txirrindulari itzulia pasa bezain laster, ohiko ibilbideari berrekingo zaio.
Herri arteko garraio publikoari dagokionez, Lurraldebusek jakinarazi du ondorengo lineak alda litezkeela Irun, Errenteria, Pasaia eta Donostiatik pasatzerakoan, 12:00etatik 14:00etara: E01, E02, E03, E04, E05, E06, E07, E08, E09, E15, E20, E21, E22, E25, E26, E28.
Errenteriako Udalak nabarmendu du ez dela espero lasterketak trafikoan eragin handiegirik izan dezan, kontuan hartuta lehen etapa Irunen hasiko dela, eta, beraz, herrira iristen denean, ohikoena litzakeela lasterketako taldea oraindik oso bateratuta egotea. Hori dela eta, azkar pasako dela da aurreikuspena: “Zirkulazioa ahalik eta azkarren jarriko da berriro martxan”.
