Gaua euren etxeetan pasa ahal izan dute Jaizkibel kaleko 20 familiek
Hilabete hasieran Trintxerpen hustutako bi atarietako bizilagunek bi aste eman dituzte lagun eta senitartekoen etxean bizitzen. Segurtasun lanak eginda, atzo bueltatu ziren etxera.
Eraikinaren behealdean dagoen supermerkatuko habetze lanak hilaren 9an hasi ziren. Argazkia: Pasaiako Udaltzaingoa. 
Pasaiako Udaltzaingoak atzo arratsaldean, 20:00ak inguruan, jaso zuen abisua teknikarien partetik Jaizkibel kaleko 9 eta 11 atarietako bizilagunak etxera buelta zitezen. Momentu hartan bertan hasi zituzten abisu lanak eta, bi aste senide eta lagunen etxean igaro ostean, atzoko gaua euren oheetan pasa ahal izan dute trintxerpetarrek; ordura arte inork ez zien ziurtatu egonkortze lanak noiz amaituko ziren.
Eraikinaren behealdean dagoen supermerkatuan atzemandako pitzaduren habetze lanak pasa den ostiralean (hilak 9) hasi zituzten, eta atzo arratsaldera arte eraikinaren egonkortasuna eta segurtasuna ezin izan zen bermatu. Obrak ez dira oraindik amaitu, baina arkitektoek adierazi dute premiazkoena zena egina dagoela eta “segurtasuna erabat bermatua dagoela”. Badirudi, azkenik, bi atarietan bizi diren hogei familiek lasai zapal dezaketela orain, hilaren 2an irtenarazi zituztenetik lehen aldiz, euren etxeetako zorua.
