"Herritar askoren eskuek eta maitasunak egina da zebrabidea"
Errenteriaren 700 urteurrenaren harira, Errenteriako Udalarekin elkarlanean elkarrizketa sorta egiten ari da HITZA. Honakoa, LGTBI+ Mahaiko Andoni Etxeberria, Naroa Zabala eta Mikel Martini egindako elkarrizketa da, galderaz galdera hamar egunez HITZA-k zabalduko duena, osorik. LGTBI+ kolektiboaren errealitateaz, LGTBIfobiaz, sustatu beharreko politikez, eta parekidetasunaz mintzo dira, besteak beste.
Francisen omenez margotutako zebrabidea azken aldiz margotu zuten ortzadar kolorez zebrabidea 2019an. Errenteriaren 700 urteurrenaren harira, Errenteriako Udalarekin elkarlanean elkarrizketa sorta egiten ari da HITZA. Honakoa, LGTBI+ Mahaiko Andoni Etxeberria, Naroa Zabala eta Mikel Martini egindako elkarrizketa da, galderaz galdera hamar egunez HITZA-k zabalduko duena, osorik. LGTBI+ kolektiboaren errealitateaz, LGTBIfobiaz, sustatu beharreko politikez, eta parekidetasunaz mintzo dira, besteak beste.
Francis aipatuta, ezinbestekoa da ortzadar zebrabidea aipatzea. Haren omenez margotu zenuten lehenengoz 2014an eta azkenekoz 2019an. Herri paisaiaren parte da, baita herritarren parte ere. Hala ikusten duzue?
Naroa Zabala: Horrela sentitzen dut nik. Herritar askoren eskuek eta maitasunak egina da, eta bere horretan herritarrena da. Zebrabideaz gain, Francisen oroigarria bertan izateak eremua tenplu txiki modukoa bihurtu du, energia bereziz biltzen duena zonaldea, eta leku egiten diona pasarte ilun batzuei eta minari. Aldi berean, harrotasun eta itxaropen kolorez janzten du zonalde hori. Herritarrena eta herriarena da.
Andoni Etxeberria: Duela hilabete batzuk pertsona batzuekin hitz egin nuen, ez da nire iritzia, baina beraiek zebrabidea eta oroigarria ikusten zuten ez duela inork hondatu, eta zioten horrek esan nahi zezakeela onartuta dagoela. Ez nuen pentsatu eta entzun nuenean ohartu nintzen badela jarrera bat, ideologia bat dela edo bestea dela gauzak ez errespetatzeko, eta egia da, hori errespetatu dela.
Mikel Martin: Ekarpen sinbolikoa da, eta aberastu egin da zebrabidea monolitoa Patxiku zelaitik bertara eraman zenean, Iztietara. Aldare edo leku magiko zentzua hartu du, iristeko dagoen zerbaiten iragarle. Ortzadarra bertan da Francisen izenarekin, plakarekin, bere kolore alaiekin… memoriala da, duina, eta aitortza eta errespetu eremua da, iraultza baten lekukoa. Aitortza hori egin behar zen, modu beroan, hurbilean, egun argiz, denok ibil gaitezen nahi dugun erritmoan eta nahi dugun bezala, eta horrek erakusten duena finean hori da, egun argiz aske bizitzeko nahia, zoriontsu izateko gogoa.
