Pasaiako arroka azaleramenduak azaltzeko bi hitzaldi eskainiko dituzte
Azken bi hitzaldiak Antxon eta Trintxerpen izango dira, datorren astearte eta asteazkenean, 19:30ean. Zuzeneko esperimentuak eta laginak ere aurkeztuko dituzte.
Hitzaldiak Jose Mª Hernandez adituak eskainiko ditu. 
Donibane eta San Pedro barrutietan eskainitako bi hitzaldien ostean, aste honetan geologia-dibulgazioaren zikloarekin jarraituko dute Trintxerpen eta Antxon. Jardunaldiak Geologian Doktorea eta zientzia-dibulgatzailea den Jose Mª Hernandez adituak eskainiko ditu, hilaren 27an eta 28an (datorren astearte eta asteazkenean).
Donibanen eta San Pedron joan den astean emandako hitzaldien ondoren, Pasaiako udalerriak duen ondare geologiko baliotsua bertatik bertara ezagutzeko Trintxerpeko eta Antxoko barrutien txanda iritsi da orain. Hurrengo eta azken bi hitzaldiak 19:30ean izango dira, lehena Trintxerpeko Alkateordetzan, eta bigarrena Antxoko Kultur Etxean.
Hernandez dibulgatzaile ezagunaren eskutik, gerturatzen direnek, udalerriko arrokak nola sortu ziren ez ezik, nola tolestu eta airepean geratu ziren ere ezagutu ahal izango dute, baita zein diren gaur egun edertasun sinestezineko arroka-azaleramenduak emateko jasaten ari diren prozesuak ere. Hori guztia zuzeneko esperimentuen bidez, kalitate handiko argazkien bidez, arroken laginen bidez, eskemen bidez eta Pasaiako azaleramendu ikusgarrienetan grabatutako bideo sekuentzien bidez.
Izen emateak helbide elektronikora idatziz edota 649 12 51 78 zenbakira deituz egin daitezke.
