Pasaiako Larrialdi Taldeak herrian hartu beharreko neurriak argitu ditu
Udalerri gorrietan ezarritako neurri bereziak bertan behera gelditu dira. Pasaiako barruti batetik bestera joateko, alboko herrietatik pasa daiteke.
Pasaiako barruti batetik bestera joateko, alboko herrietatik pasa daitezke herritarrak. 
Pasaiako alkate den Izaskun Gomez atzo Larrialdi Taldearekin bildu zen, Eusko Jaurlaritzak Koronabirusaren aurka iragarritako neurri berrien ezarpena koordinatzeko. Neurri horiek urriaren 26ko EHAOn argitaratu ziren. Atzotik aurrera bertan behera geratu ziren kutsatze-tasa handiko udalerrietarako (besteak beste, Pasaiarako) ezarri ziren murrizketa bereziak, eta Euskal Autonomia Erkidegoko udalerri guztietarako muga berberak ezarri dira.
Hauek dira azken neurriak:
- Pasaitarren zirkulazio-askatasuna murriztuko da 23:00etatik 6:00etara.
- Pasaiatik kanpoko desplazamenduak debekatuta daude.
- Bi kasu horietan zirkulazioa baimenduta egongo da, lan-, hezkuntza- eta osasun-arrazoiengatik edo ezinbesteko beste kausengatik.
- Eremu publiko nahiz pribatuetan gehienez ere 6 pertsona bil daitezke, salbu eta bizikideak badira.
- Ostalaritzako establezimenduei dagokienez, jada ez dute 21:00etan itxi beharko, aurreko arauak ezartzen zuen bezala; 23:00ak arte zabalik egon daitezke.
- Alboko udalerrietara joan daiteke jarduera sozioekonomikoak egitera. Beraz, pasaitarrak Donostiara, Errenteria-Oreretara, Lezora eta Hondarribira joan daitezke, era horretako jarduerak egitera.
Pasaiaren berezitasuna dela-eta, alkateak argitu nahi izan du Pasaiako barruti batetik bestera joateko, alboko udalerrietatik pasa daitezkeela herritarrak (Errenteria, Lezo edo Donostiatik, alegia).
