Hondakinen edukiontzietan pedalak jartzeko eskatu du EAJ-k
Eskaera duela bi urte pasa egin zuela EAJk ekarri du gogora; higienea eta irisgarritasuna daude eskaeraren atzean.
Elixabete Murua jeltzaleen bozeramailea. Argazkia: EAJ Edukiontzietan pedalak jartzeko eskatu dio gobernu taldeari EAJk irisgarritasun zein higiene arrazoiengatik premiazkoa dela iritzita. Ez dela eskera berria esan du Elixabete Murua bozeramaile jeltzaleak: “2018ko ekainean arazoa aztertzeko eskaera egin genuenetik bi urte eta erdi joan dira, eta uste dugu badela erantzuteko garaia”. 2017ko azaroan ezarri zen hondakinen bilketarako sistema berria Errenteria-Oreretan eta orduan edukiontzi marroi eta grisetan pedala jartzea aurreikusi ez bazen ere erabiltzen hasi orduko argi gelditu zela zenbait pertsonak edukiontziak zabaltzeko zailtasunak zituztela esan du Muruak.
Sarrailekin arazoa izan dela aspalditik eta une honetan ere hala dela erantsi du Garbiñe Oiarbide zinegotzi jeltzaleak, bestalde, eta pedalak jarri edo ez aztertzeko lehenik sarrailekin dagoen arazoa konpondu behar dela erantzun dietela gobernu taldetik, “bi urte pasa dira eskaera egin genuenetik eta ez da sarrailen arazoa konpondu, ezta pedalena aztertu ere. Joan den astean egindako jarraipen batzordean berriz ere jarri genuen gaia mahai gainean”. Muruak azaldu duenez gaia San Marko Mankomunitatean atera zen, “datorren urteari begira edukiontzi irisgarri bat probatzeko aukera eta sarrailei dagokionean tapak kolpetik ixterakoan apurtzen direla erantzun zuten. Uste dugu badela garaia udalak arazoari erantzuna emateko”.
Edukiontziei pedal jartzeak izan dezaken kostea ere kalkulatu dute jeltzaleek: “edukiontzi bakoitzeko 256,5 eurokoa litzateke, guztiei jartzea, berriz, 77.500 euro”. Urola KOstari begira jarri dira, bertan pedala dute edukiontziek, eta eskaera zehatza egin diote gobernu taldeari: “Urola Kostako arduradunekin harremanetan jartzea eskatzen dugu esperientziaren berri galdetzeko, eta Errenteriako edukiontzien fabrikatzaileari aurrekontua eskatzea pedalak jartzea zenbat kostatuko den jakiteko, eta bide batez, edukiontziak erabat irisgarriak izateko palanka jartzeak zenbat balio duen”.
