'Zaldibar zona cero' aurkeztuko du Ahoztar Zelaietak Gaztañon
Bi langile tona hondakin eta lur azpian harrapatu zituen katastrofearen arrazoiak ikertu ditu eta liburua idatzi Zelaietak.
Ahoztar Zelaieta kazetari, ikerlari eta idazlea. Argazkia: Txalaparta Konfinamenduak eten ostean, hitzaldien zikloa berrartu du Gaztañoko Auzo Elkarteak. Ikasturte berriko lehena, Jon Maia bertsolari, idazle eta gidoilariarekin egin zuten urrian; 1970 hamarkadako migrazioari begira jarri zituen Maiak bertaratu zirenak. Orain berriz, gaurkotasun betea duen Zaldibarko zabortegiko auzia gerturatuko die auzo elkarteak auzotarrei eta bertaratzen diren guztiei.
Datorren astean izango da liburu aurkezpena eta hitzaldia, hilaren 13an (ostirala) 19:00etan.
Kazetari, ikerlari eta idazlea da Ahoztar Zelaieta, eta Zaldibar zona cero (Txalaparta, 2020) liburua argitara atera berri du. Otsailaren 6an behera etorri zen zabortegia Zaldibar ondoan, lurrak eta zaborrak A-8 autopista hartu zuen, eta latzena, luiziak azpian harrapatu zituen zabortegiko langile ziren Joaquin Beltran eta Alberto Sololuze. Abuztuan Sololuzeren gorpuzkiak aurkitu zituzten, luizia izan eta sei hilabetera; Beltranenak ez dituzte oraindik aurkitu, bederatzi hilabete luze joan badira ere.
Tragediaren tamainari erreparatuta, haserrea piztu zuen sektore ugariren artean eta luizian harrapatuta gelditu ziren bi langileen senideen artean Iñigo Urkullu zein gobernuan dauden beste hainbat mandatarien hoztasunak; Urkulluk berak, sei egun behar izan zituen tragedia izandako zabortegira bertaratzeko, bi herritar tona hondakin eta lur azpian zeuden bitartean.
Katastrofearen arrazoiak ikertu ditu eta liburua idatzi Zelaietak. Hondakin arriskutsuen zein influentzien trafikoa, kontrol eta zaintza falta, espekulazio urbanistikoa, enpresa pribatu eta erakunde publikoen arteko ate birakariekin egin du topo ikerlariak egia eta gertatutakoaren arrazoiak topatu nahian zabaldutako bide horretan. Garraiolari, langile eta bizilagunek ‘zuloa’ izenez ezagutzen zuten zabortegiaren kudeaketaren arduradunei izenak eta abizenak jarri dizkio Zelaietak bere liburuan.
Horretaz guztiak eta Zaldibarko zabortegiaren inguruko beste hamaika kontuz aritzeko aukera izango da Gaztañoko auzo elkartearen egoitzan. Osasun neurriak eta segurtasuna bermatzeko indarrean dauden neurri guztiak errespetatuko direla zorrotz jakinarazi dute antolatzaileek.
