Zumardia eta Iztieta pasealekuaren artean banatuko dute azoka txikia
Udalak dio, neurriarekin, hainbat jarduera bateragarriak izango direla, osasun baldintzak ziurtatuz.
Astelehenero Zumardian egiten den azoka txikiak agertoki berria izango du astelehenetik aurrera. Horren arabera, orain arte Zumardian izan diren postuak, zumardia bera eta Iztieta pasealekuaren artean banatuko dituzte.
Ostalaritza establezimenduetako terrazek, bide publikoa okupatzea beharrezkoa duten beste eskaera batzuk, eta azoka txikiak berak espazioa partekatu behar izaten dute astelehenero. Elkarbizitza hori sustatu, jarduera ekonomikoa mantendu, eta indarrean dagoen osasun araudia betetzeko hartutako erabakia da udalak jakinarazi duenez azoka berrantolatzearena: “Hainbat jarduera bateragarriak izango dira neurri horrekin, osasun baldintzak ziurtatuz”.
Astelehenetik aurrera beraz, Zumardian eta Iztieta Pasealekuan, ibaiaren ondoan banatuko ditu udalak azoka txikiaren postuak. Iztieta pasealekuko postuak askotarikoak izango dira eta jantziak, osagarriak eta elikadurak salduko dituzte. Ordutegia orain artekoa izango da bi eremuetan eta Iztieta pasealekuan izango diren postuak lau astean behin txandakatuko dituzte erdiguneko azoka txikiko gainontzeko postuekin.
