Azaroaren 25ari begira, ‘Indarrez ezer ere ez’ kanpaina Lezon
Lezoko Udalak eta herriko hainbat eragilek elkarlanean diseinatutako egitasmoa da .Indarkeria matxistaren kontrako jarrera ager dezatela eskatu diete lezoarrei.
Indarkeria Matxistaren Kontrako Nazioarteko Egunaren harira, Lezoko Udalak eta herriko eragileek kanpaina berri bati ekingo diote: Indarrez ezer ere ez. Udalaz gain, Gaxuxa Emakume Taldeak, Lezoko Emakumeen Taldea, Kuadrillategik, Osakidetzak, Lezo Institutuak, Lezo Herri Eskolak eta Pasaia-Lezo Lizeoak egin diote ekarpena egitasmoari, eta horren partaide aktibo izango dira.
Kanpainaren bitartez emakumeen kontrako edozein jarrera eta indarkeria klase gaitzetsi nahi dituzte, errespetua eta berdintasuna izanik, udalaren esanetan, elkarbizitzarako zilegizko eremua.
COVID-19ak eragindako osasun krisian, gainera, emakumeenganako indarkeria areagotu dela ondorioztatu du udalak, batez ere etxealdia izan zenean. Udal erakundeak esku artean dituen datuen arabera, osasun larrialdiaren lehen hilabetean (martxo eta apirila artekoan), 2019 osoan adina indarkeria matxista kasu eman ziren herrian. «Horiek atzemandako kasuak besterik ez dira», esan dute udaletik: «Konfinamenduak, mugimendu murrizketak eta harreman mugak indarkeria matxista ugaltzeko eta ugaritzeko haztegi bat izan dira».
Hori horrela, azaroaren 25ari begirako ekitaldi eta jardueretan «inoiz baino gehiago» parte hartu behar dela iritzi dio Lezoko Udalak: «Eraso sexistak gaitzesteko indarrak batzea ezinbestekoa da. Indarkeria matxistari aurre egitea guztion ardura da».
Egitaraua eta bitartekoak
Mezuez gain, Lezok indarkeria matxistari eman beharreko erantzuna askotarikoa izan behar dela uste du udalak. Horrela, aurreko urteetan bezala, hilaren 23tik 30era balkoi eta leihoetan zapi gorriak jartzera animatu dituzte herritarrak; ez daude oihal berriak, iazkoak erabili behar dira. Musuko nahiz txapa more berriak egin ditu, ordea, udalak. Horiek hilaren 16tik 22ra eskuratu ahal izango dira Lezoko osasun zentroan nahiz udaletxean. Beraz, herriaren paisaia emakumeen kontrako indarkeriaren aurkakoa izatea nahi dute egun horietan.
Ikurretatik harago doa Indarrez ezer ere ez kanpaina. Kultur ekitaldiak ere daude. Lehena hilaren 25ean bertan da: 19:00etan, Gezala Auditoriumean, Isiltzen joan zirenak ipuin musikatuaz gozatzeko aukera izango da Ameli eta Xirrikituen Jostunak taldearen eskutik. Lurdes Iriondoren obran oinarritutako emanaldia da.
Hilaren 28an, berriz, Euskal Herriko bakarlari esanguratsuenetako batentzat tartea: Anarik kontzertua emango du Gezalan, 19:00etan hasita.
Bi saio horietarako sarrerak aldez aurretik eskuratu behar dira derrigorrez, udalaren webgunearen bidez.
