Gizona bere buruaz beste egiteko intentzioz igo da dorrera
"Ertzaintzak arabiarrak gorroto ditu. Agur" egin du oihu dorrearen gainetik. 21:15a aldera, negoziatzaileekin hitz egin ostean, bere kabuz jaitsi da gizona.
Gizon bat Pasai Antxoko Adifen tren geltokiko dorre batean igota hauteman dute 15:30a aldera, kamiseta eta galtzarik gabe, galtzontziloak soilik zeramatzala soinean. Gizonezkoa bere buruaz beste egiteko intentzioz igo da dorre gainera, 20:30a aldera honako hitzak oihukatu baititu: “Ertzaintzak arabiarrak gorroto ditu. Agur.”.
Dirudienez jatorriz arabiarra den gizona sei orduz egon da, gutxienez, estrukturaren gainean. Ertzaintzaren hainbat patruila bertaratu eta garabi batean igo dira negoziatzaileak harekin hitz egitera. “Klaudiarekin hitz egin nahi dut”, eskatzen zuen.
Antza denez, negoziatzaileek emakumearekin hitz egitea lortu dute, hala iragarri baitiote gizonari “fidatu nitaz, harekin hitz egin dugu”, esan dio garabiaren gainetik ertzainak. 21:15a aldera, bere kabuz dorrearen eskaileretatik jaitsi da gizona. Ertzaintzaren ardurapean gelditu da.