Suziriak eta dantza, Lezoko Euskaraldia hasteko
17:00etan, Euskaraldiaren pankarta jarri eta suziriak botako dituzte. Aldi berean, herriko hiru plazatan dantzariek saioa emango dute.
Xoxolur Mendi Klubekoak arigune dira. Behar bezalako harrera egingo diote Euskaraldiari, ostiralean, Lezon. 15 eguneko euskararen erabileraren aldeko iniziatiba kolektiborako 707 lezoarrek (astearteko datua) eman dute izena ahobizi edo belarriprest izateko, eta 30 entitatek eratuko dituzte ariguneak. Beraz, Euskaraldiak badu babesa herrian.
Harrera ekitaldia 17:00etan hasiko da. Euskaraldiaren pankarta jarriko dute udaletxeko balkoi nagusian, eta hori egitearekin batera hiru suzirik Lezoko zeruan eztanda egingo dute. Orduantxe hasiko da Lezoko Euskaraldia.
Suzirien eztandarekin batera, dantza. Aralar kaleko plazatxoan, Jauregialdeko plazan eta Gurutze Santuaren plazan herriko dantzariek pieza bana dantzatuko dute aldi berean. Herriko plaza nagusian Katerin Artola eta Iker Belintxon Euskal Herriko Dantza Txapelketako irabazleek egingo dute saioa.
Iniziatibaren egitarauaren barruan, Tomas Garbizu Musika Eskolako ikasleek ere ekarpena egingo dute. Hala, abenduaren 3an (Euskararen Eguna), ikasleek grabatutako Euskaraz bizi nahi dut abestiaren bideo muntai zabalduko dute Interneten eta sare sozialetan.
Lezoko Euskaraldiaren Herri Batzordearen desioa zen ekitaldi gehiago antolatzea, baina osasun egoeragatik hainbat asmo eta ideia bertan behera laga beharrean izan dira.
