[Bideoa eta galeria] 'Ekintzara' deitu du Pasaiako Mugimendu Feministak
Donibaneko plazara bildu dira Pasaiako barruti guztietan emakumeen eta jendarte parekide baten alde lanean ari diren hainbat elkarteetako ordezkariak mugimendu horretan bat eginda.
Agerraldia gaur, Pasai Donibanen, Azaroaren 25aren harira. Ate joka da Azaroaren 25a, Indarkeria Matxistaren kontrako eguna. Egun horrek, egutegian markatuta jarraitzen du, tamalez, oraindik ere urrats asko, gehiegi egin behar direlako parekidetasunaren bidean; oraindik ere, egunerokoa delako emakumeen kontrako indarkeria, emakume izateagatik hiltzen dituztelako, erasoak ez direlako amaitu.
Egun horren harira, Pasaiako Badiaren bihotza hartu du Pasaiako Mugimendu Feministak gaur goizean. Donibaneko plazara bildu dira Pasaiako barruti guztietan emakumeen eta jendarte parekide baten alde lanean ari diren hainbat elkarteetako ordezkariak mugimendu horretan bat eginda. Mezu argia ozen zabaldu dute: “Pentsamendu kritikodun sare bat sortu eta sustatu nahi dugu, eta horregatik ekintzara egiten dugu deia”.
Bildutako guztiak pasaitarrak, “bakoitzak gure ingurunetik urteak daramatzagu borrokan eta lanean. Gaur da eguna, badia hau erabiltzea erabaki duguna, maiz banaketa geografikoa dakarkiguna, gure batasun indarra eta kolektiboaren aldarrikapena erakusteko”. Gaur izan da ere eguna, publikoki elkartuta aurkeztu direna, “emakumeen kontrako zapalkuntzari aurre egin eta berdintasunezko gizarte bat, gizarte feminista bat defendatzeko”.
Osasun krisi globalari ere erreparatu diote, horrek areagotu egin duelako emakumeen kontrakoa skotariko indarkeria, “ekonomikoa, etxeko langileen prekarizazioa, poliziaren indarkeria eta kontrol soziala, harreman desorekak, familia eredu zurrunak…”. Horren aurrean, indar kolektiboak inoiz baino indar handiagoa duen ziurtasun betea azaldu dute, “Pasaiako lau udalerrietako emakumeok bat egin dugu bazterretatik ateratzeko eta begirada erdigunera eramateko, gure badiara, haserrea eta kezka erakusteko”. Elkartzen badira bakarrik sor dezaketela berdintasunezko gizarte bat esan dute bildutakoek, indarkeriarik gabeko gizartea, eta konbentzituta azaldu dira, aktibismo feministatik bizimodu berri bat sor dezaketela, “bizimodu horretan, generoari, arrazari eta ekonomiari lotutako ezberdintasunak desagertaraztea posible izango den gizarte ongizatea lortuko dugu”.
Inoiz baino gehiago hartu nahi dutela kalea erantsi dute, beraien aldarrikapenekin badia hartu, euren ahotsa entzun dadin eta ikus ditzaten, “gure borrokaren kolore oreak Pasaiako badiako txoko guztiak busti ditzan”, eta mugimendu feministaren zeharkakotasuna aldarrikatu dute, “bizitako alderdi guztiei eragiten dielako”.
Badia, more
Agerraldia amaituta badia erdira begira jarri ditu guztiak antolatu duten ekintza ikusgarriak. Sirena hotsek lehorretik, ontzien sirenen erantzuna jaso dute eta ke morez jantzia da Pasaiako Badia.
Ekintza feminista eraginkor eta erabakigarriak egiteko gai izango den talde sare bat garatzea dute helburu nagusia, eta bide horretan hasi dira urratsak egiten..
Azaroaren 25erako deialdiak
- Pasaiako lau barrutietan: komunitateari dei egin diote balkoietan oihal moreak zintzilikatzera.
- San Pedro: Espazio publikoaren interbentzioa, Ikastea iraultzailea da QR informatzaileak.
- Antxo: 19:00etan Zumardian.
- Trintxerpe: 19:00etan Gernika plazan.
- Donibane: 20:00etan kanpaien jotzea eta auto karabana.
