Mugikortasun diagnosia egin eta erronka nagusiak identifikatzen ari da udala
Lezo herri jasangarria izatea da helburua, horretarako motorrik gabeko mugikortasuna sustatuz eta ingurumenaren eta energiaren ikuspegitik eraginkorrenak diren bideak erabiltzearen alde eginez.
Lezoko Mugikortasun Plana idazteko lanak egiten ari da udala, lehenengo plana izango da, eta une honetan, zehazki, egoeraren azterketa eta diagnostikoa, eta mugikortasun arloan dauden erronka nagusiak identifikatzen ari da. Azken egunotan, kontaketak eta galdeketak egiten aritu da herrigunean, industriagunean zein gidarien artean.
Hilaren 13 eta 16an, hain zuzen, herrigunean oinezkoei zuzendutako galdeketak egin zituen, eta hilaren 17an, industriagunera jo zuen kontaketak egitera. Azaroaren 18an, halaber, gidariei zuzendutako galdeketak egin zituen herriko lau puntutan: Jaizkibel hiribidean, Elias Salaberrian, Jaizkibel Hiribidean eta Gi-2938 gasolindegietan.
Orain, trafikoaren kontaketa automatikoak eta abiaduraren kontrol lanak egitea aurreikusi du udalak, eta behin lan horiek amaituta, idazketa lanen bigarren faseari ekingo dio; jarraitu beharreko neurri zehatzak jasoko dituen ekintza plana osatzeari, alegia. Lan horiek, 2021ean egitea aurreikusi du.
Lezo herri jasangarria izatea da helburua, horretarako motorrik gabeko mugikortasuna sustatuz eta ingurumenaren eta energiaren ikuspegitik eraginkorrenak diren bideak erabiltzearen alde eginez.
