Bizilagunak, elkartasun sareak jostera dator
Egoera berrira moldatuta dator aurtengo Bizilagunak Iniziatiba. Ezingo dute programan parte hartuko duten familiek bazkaririk partekatu, kultura, ohiturak eta bizipenak amankomunean jartzeko, baina elkartasuna ez da faltako.
Egoera berrira moldatuta dator aurtengo Bizilagunak Iniziatiba. Ezingo dute programan parte hartuko duten familiek bazkaririk partekatu, kultura, ohiturak eta bizipenak amankomunean jartzeko, baina elkartasuna ez da faltako.
Gaur eman dituzte programaren gaineko zehaztasunak SOS Arrazakeriako Gerar Carrerek eta Wendy Martiza Rodriguezek. Pandemiaren eragina saihestuta Bizilagunak nola antolatu pentsatzen hasi zirenean, ohartu ziren, programa horrek oinarrian zerbait badu kolaborazio izpiritua dela, “horri segida eman nahi diogu, jendeak elkar ezagutzea, bizi garen espazio isolatuak apurtzea, eta aldi berean, horrek, adiskidetasun eta topaketarako espazioak sor ditzala”, esan du Carrerek.
Hitz bakarrean, Bizilagunak elkartasuna da.
Pandemiak langabezian utzi du jende asko eta aurretik zutena baina egoera prekarioagora eraman ditu Carrereren hitzetan, “COVID-19ak gizartearen sektore prekarioenei eragin die, eta kasu askotan migranteei, ostalaritzan, zaintzan, salmenta ibiltarian… “. Egoera hori isolamenduan eta bakartasunean bizitzea oso zaila dela uste du, “ez dizulako sare sozialetara jotzeko aukerarik ematen laguntza eske”. Hori beraz, Bizilagunak programaren aurtengo asmoa, sareak jostea, babes sareak eraikitzea. Horri begira, herritar guztiak deitu dituzte bat egitera iniziatibarekin. Dinamika honakoa: familia bikoteak egingo dituzte eta hilabete batzuez harremanetan izango dira, elkarren berri izango dute elkarri babesa emateko beharrezkoa balitz. SOS Arrazakeriaren lana harreman hori elikatzea izango da, eta bideokonferentzia bidez, eta egoerak ahalbidetzen badu elkartze puntualak eginda.
Sare sozialen bidez hasiera
Hilaren 29an hasiko dute Bizilagunak programaren aurtengo ekitaldia, 17:30ean, beraz dagoeneko izena ematea zabalik da; hala ere, 29tik aurrera ere izena emateko aukera izaten jarraituko dute parte hartu nahi dutenek. Momentuz, hamabost familiek eman dute izena parte hartzeko. Programaren irekiera ofiziala sare sozialen bidez egingo dutela azaldu du Carrerek, eta bideo bat erabiliko dute horretarako. Bizilagunak proiektuaren aurtengo ekitaldiaren nondik norakoak azalduko dituzte bideo horretan, eta SOS Arrazakeria elkarteko kideekin batera, Aizpea Otaegi alkateak eta Jon Maia bertsolariak hartuko dute parte. SOS Arrazakeriaren Facebook, Youtube eta Instagraman kontuetan zabalduko dute bideoa hilaren 29an 17:00etan.
Etxeko langilea da Rodriguez, langabezian gelditu da pandemiaren testuinguruan eta SOS Arrazakeriako Etxeko Langileen taldeko kolaboratzailea da. Bederatzi urte dira Errenteria-Oreretara heldu zela, eta Honduraskoa da. Iaz Bizilagunak iniziatibaren barruan parte hartu zuen familietako bat izan zen berea.Esperientzia polita izan zela dio, “jendea ezagutzeko aukera ematen du, kulturak nahasteko eta adiskidetasun sareak sortzeko. Esperientzia zoragarria izan zen iazkoa, eta oraindik ere harremana mantentzen dute ezagutu nuen familiarekin”.
Bakardadea, sarerik ez duzunean inguruan oso latza dela erantsi du Carrerek, “sareak, babes bat sortzea da helburua, denboran iraungo duena. Hau ez da amaitu, eta ondorio latzak izango ditu, baita amaitzen denean ere”. Harago jo du Rodriguezek, eta beraietako batzuk hemen familia badute ere, migrante askok familia ez dutela inguruan esan du, “bakarrik daude, urruti daude maite dituztenak, eta Bizilagunak programaren bidez ezagutu ditugun familia eta pertsonak, gure familia izatera pasa dira. Hori ikaragarria da”.
Parte hartu nahi dutenek 685 749 756 telefono zenbakira deitu behar dute, posta elektronikora mezua bidali, edo web gunearen bidez izena eman. Argi esan du Carrerek, “norabide bikoitzeko elkartasuna da”.
