Duintasuna eta erreskate ekonomikoa eskatzeko manifestaziora deitu dute ostalariek
Oarsoaldeko ostalariek manifestaziora deitu dute larunbatean, duintasuna eta erreskate ekonomikoa eskatzeko bere sektorearentzat.
Ostalarien agerralda manifestaziora deitzeko. Argazkia: Carrera. Nekatuta, ekonomikoki itota, eta COVID-19ak ezarritako tunel ilunean argitasunik aurkitu ezinik daude ostalariak. Ez zuten arrazoirik gabe SOStalaritza leloa zabaldu; horrek primeran erakusten du bizitzen ari diren egoera, eta izaten ari den ondorioak, pandemiaren ondorioz zigortuena izaten ari den sektore ekonomikoaren egoera gorria delako.
Zortzi hilabete dira COVID-19a agertu zela, eta ordutik, zortzi hilabete horietan tankera guztietako salaketa eta epaiketen erdigunea izan dela ostalaritza salatu zuten atzo hamarnaka ostalarik Errenteria-Oreretako Zumardian egin zuten agerraldian, “horietako asko guztiz arbitrarioak”. Horren ondorioz, hartu diren neurriek ostalariek euren jarduera baldintza duinetan egitea eragotzi dutela azaldu zuten, “hala ere, ostalaritzak osasun egoera larria eta egoera horretan duen eginkizuna ulertu ditu, eta nabarmen bete ditu ezarri zaizkion arau eta baldintza guztiak”.
Bi egun lehenago, Errenteriako Udalak onartu duen 300.000 euroko diru laguntza lerroaren berri emateko agerraldia egin zuen Ostari elkarteak udal ordezkariekin batera. Agerraldi horretan esan zuen Ostariko ordezkari den Fernan Cuellarrek, diskurtsoa agortuta dutela ostalariek, denetarik esan dutela egunkarietan, irrati eta telebistetan, eta horrenbestez kalea hartzea baino ez dutela. Hori izan da atzoko agerraldiaren arrazoia. Kalea hartuko dute, eta hilaren 28an Oarsoaldeko manifestazioa egingo dute; Zumarditik abiatuko da 17:30ean.
Ostalarien agerraldia manifestaziora deitzeko. Argazkia: Carrera.
Bizi duten egoeraren berri eman zuten atzoko agerraldian, eta azken zortzi hilabetetan egunero-egunero galerak izaten ari badira ere, eta nahiz eta hiru hilabete baino gehiagoz derrigorrez itxita izan diren arren askotan fakturazioaren %50 galduz, oraindik ere z dagoela sektorearekiko laguntza espezifikorik nabarmendu zuten, “salbuespen batzuk izan ezik, ez dago ez laguntzarik, ez laguntzak bermatzeko borondaterik ere”.
Larunbat arratsaldeko manifestazioaren bidez duintasuna beren sektorearentzat eta erreskate ekonomikoa eskatuko dituzte, eta bat egitera deitu dituzte ostalaritzako langile guztiak, baita ostalaritzako zeharkako sektoretako langileei ere. Herritarrak ere deitu dituzte parte hartzera, “ostalaritza guztiona delako, guztion bizitza sozialaren parte, azken asteetan frogatu den bezala”.
Manifestazioa 17:30ean abiatuko da Zumarditik eta Errenteria-Oreretako kaleetatik barrena egin eta gero, Zumardian amaituko da manifestu baten irakurketarekin.
