Jaione Jauregi Alcala Mecon espetxeratu dute
Jauregiren Espainiaretzearen eta atxilotzearen kontrako manifestazioa egin dute gaur arratsean Lezon.
Espainiako Auzitegi Nazionaleko epailearen aurrean deklarazioa egin ondoren, epaile hark erabaki du Jaione Jauregi lezoarra espetxeratzeko agindua ematea. Berehala eraman dute Alcala Meco (Madril, Espainia) presondegira. Atzo Espainiaratu zuten lezoarra, joan den astean atxilotu ondoren. Horren kontrako mobilizazioa egin dute gaur arratsaldean Lezon, Sortuk deitua. Ehunka herritarrek bat egin dute deialdiarekin.
Ganteko (Belgika) Auzitegiak Jaione Jauregi Espainiaratzea onartu zuen hilaren 5ean, ETAko kide gisa 1981eko martxoan Ramon Romeo Espainiako armadako teniente koronela hiltzea leporatuta, besteak beste. Paul Bekaert abokatuak jakinarazi zuen helegitea jarriko dutela Kasazio Auzitegian. Helegite hori baztertuta (hilaren 17an), Espainiaratzeko agindu irmoa ezarri zioten Jauregiri, eta atxilotu. Atzo gauzatu zuten estradizioa.
Jauregiren epaileak adierazitakoaren arabera, preskribatua dago Jauregiri Espainiako Auzitegi Nazionalak leporatzen dion hilketa. Libre uzteko eskera egin du epailearen aurrean gaur. Hark, ordea, espetxeratze agindua eman du.
Gaur Lezon egin den manifestazioaren hasieran esan dutenez, Jauregik epailearen aurrean esan du bizitza publikoa egiten zuela, ez zela ezkutuan bizi. Bere burua “trukerako txanpon” bezala erabili dutela adierazi du aldi berean lezoarrak. Gainera, Sortuk deitutako manifestazioaren hasieran esan dutenez, mendekuan oinarritutako erabakia izan da Jauregiren Espainiaratzea eta espetxeratzea, eta horretan eragina Espainiako hainbat talderen presioak izan duela.
