Jaione Jauregi Espainiaratzearen kontra, manifestazioa egingo dute gaur Lezon
Martxa 19:30ean abiatuko da, Gurutze Santuaren plazatik. Belgikako Poliziak hilaren 19an atxilotu zuen, Espainiaratzeko asmoz.
Jaione Jauregi iheslari lezoarrari babesa adierazteko manifestazioa egingo dute gaur, 19:30ean hasita, Lezon. Sortuk deitu ditu herritarrak manifestaziora. Gurutze Santuaren plazatik abiatuko da martxa. Hilaren 19an atxilotu zuten Jauregi Ganten (Belgika).
Ganteko Auzitegiak Jaione Jauregi Espainiaratzea onartu zuen hilaren 5ean, ETAko kide gisa 1981eko martxoan Ramon Romeo Espainiako armadako teniente koronela hiltzea leporatuta, besteak beste. Paul Bekaert abokatuak jakinarazi zuen helegitea jarriko dutela Kasazio Auzitegian. Helegite hori baztertuta (hilaren 17an), Espainiaratzeko agindu irmoa ezarri diote Jauregiri, eta atxilotu. Teorian, Belgikak hamar eguneko epea du auzitegiaren erabakia gauzatzeko.
2016an atxilotu zuten Jauregi azkeneko aldiz, Belgikan, Espainiako Auzitegi Nazionalaren eskariz, baina segidan utzi zuten aske berriro. Aurretik 2013an ere atxilotu zuten —iheslariak bizitza arrunta egiten zuen Belgikan ordurako—. Ez da Jauregi Espainiaratzeko eskatzen duten lehen aldia. 2004an, 2005ean eta 2015ean Belgikako justiziak Espainiaratzeari uko egin zion, iritzita Espainiak Jauregiren giza eskubideak urra zitzakeela.
Jauregik elkarrizketa eskaini dio Berria egunkariari. Hemen klik eginda, elkarrizketa hori osotasunean.
