Bizi Errenteriarekin bat egitera deitu dituzte oraindik atxiki ez diren establezimenduak
Errenteriako Udalak erosketa bonuen bigarren kanpaina abiatuko du laster, eta horren harira, oraindik ere Bizi Errenteria programarekin bat egin ez duten establezimenduei atxikitzeko eskatu die.
Errenteriako Udalak erosketa bonuen bigarren kanpaina abiatuko du laster, eta horren harira, oraindik ere Bizi Errenteria programarekin bat egin ez duten establezimenduei atxikitzeko eskatu die. Hala eginda, bonuen kanpaina horretan parte hartzeko aukera izango dute. Horretarako, lehenbailehen bete eta bidali behar dute Bizi Errenteriaren web orriko galdetegia.
Egun 235 dira programarekin bat egin duten saltokiak, eta kopuru hori handitu egin nahi du udalak, “izan ere, oso garrantzitsua da ahalik eta ekonomia eragile gehien esku hartzea, herriari bizitza emateko, eta guztion ongizatean laguntzea helburu duen iniziatiba hau emankor gerta dadin”.
Bat egin dezaketen establezimenduak dira bonuen bidez ondasun edo zerbitzuak erosteko aukera ematen duten Errenteria-Oreretako merkataritza, zerbitzu, ostalaritza eta jatetxeetako txikizkako guztiak. Deialditik kanpo gelditzen dira, bestalde, firma handien edo Espainiako Estatuan edo nazioartean ezarpen handia duten enpresa filialak, bai eta azalera handiak ere (400 metro koadro baino gehiagokoak).
Programarekin behin atxikituta, establezimenduaren izena Bizi Errenteriaren web orrian azalduko da, eta gutun batean jasoko ditu Bizi Errenteria ikurra, bonuen inguruko azalpenak eta aplikatutako hobariak ordaintzeko eskaera egiteko inprimakia.
Dagoeneko atxikituta dauden establezimenduek ez dute ezer egin behar Erosketa Bonuen bigarren kanpainan bonuak jaso ahal izateko.
Zalantzak argitzeko bi telefono jarri ditu udalak interesdunen eskura: 943 449 600 eta 010.
