"Konpromiso politiko argia behar dugu indarkeria matxistaren aurka"
Behar beharrezko baldintza da udalaren ustez, herriak eta hiriak bizikidetza seguru, solidario eta berdinzalerako gune gisa indartzea.
Zazpi udaltzain plaza atera ditu lehiaketara udalak. Azaroaren 25aren harira, adierazpen instituzionala egin du Errenteriako Udalak. Ezinbestean, pandemiari begira jarri da adierazpenen horretan; izan ere, jakitun da, krisi testuinguru guztiek indarkeria matxista biderkatzeko eta ugaritzeko hazitegia direla. Horregatik, arreta jartzera deitu du beren etxeetan, lanetan eta bizi espazioetan bizirik irauteagatik indarkeriari aurre egiten ari diren emakume eta neskengan, “gizartearen aitortza eta elkartasun osoa merezi dute”.
Testuinguru horretan, isolamendua, babesgabetasuna eta ikusezintasuna saihesteko baldintza egokiak sortzeko lanean jarraitu beharra dagoela nabarmendu du, eta gogora ekarri ditu aurten indarkeria matxistak Euskal Herrian hil dituen lau emakumeak, “errealitate mingarri horrek gizarte gisa interpelatu egiten gaitu, lanean jarraitzeko eta mobilizatzeko konpromisoa hartzeko, horrela gerta ez dadin”.
Ez dela horrekin nahikoa argi du ordea, “gizarteak erakundeei eskatu die indarkeria matxista lehentasun politiko bihur dezala, eta konpromiso politiko argia behar dugu; zerbitzu publikoen eta erakundeen laguntza eta baliabide guztiak izateko garaia da, emakumeei beren askapen, berreskuratze, ahalduntze, eta autonomia prozesuetan laguntzeko garaia. Behar beharrezko baldintza da, gainera, gure herriak eta hiriak bizikidetza seguru, solidario eta berdinzalerako gune gisa indartu daitezen”.
Errenteriako Udalak konpromiso zehatzak hartu ditu. Hala, indarkeria matxista sufritzen duten emakumeen eskubideak arreta prozesu osoaren erdigunean jarriko ditu. eta Horretarako, hirugarren berdintasun planari begira indarkeriaren ardatzaren lanketa propioa 2021eko lehen hiruhilekoan prest edukitzera konprometitu da.
Behaketa hobetzea da beste konpromisoa, indarkeria egoeretan azkar jarduteko. Emakumeen ahalduntzea eta gazteen artean indarkeriaren prebentzioa lantzeko programak bultzatuko ditu, halaber, eta pandemia garaian sortu ziren tokiko zaintza sareak babestuko ditu. Pandemiak emakumeen pobretzean eta kalteberatasunean duen eragina aztertuko du, gainera, laguntza jarduera zehatzak diseinatu ahal izateko, eta genero ikuspegia txertatuko du diru sarrerak eta krisiaren beste eragin negatibo batzuk aritzeko neurrietan.
Erakundeen arteko elkarlana eta koordinazioa eskatzea da hartutako beste konpromisoetako bat.
Oreretako Mugimendu Feministak biharko deitu dituen mobilizazioekin bat egin du udalak, eta herritarrak parte hartzera deitu ditu. Zumardian izango da elkarretaratzea 19:00etan.
Adierazpen instituzional osoa 2020-11-24-Erakunde adierazpena, Azaroak 25 irakur daiteke.
