'Nelly y el señor Arnaud', eta Rebordinos
Zineman film bat ikustea inoiz baino "konprometituagoa" den garaiotan, Errenteria-Oreretak kultura zinematografikoarekin betidanik izan duen lotura ekarri du gogora OzZinemak, eta memoria ariketa proposatu.
2020. urtea pandemiak markatuta heldu bada ere, ospakizun handiko urtea ere bada. 700 urte bete ditu Errenteriak, hiribildu eratu zenetik, eta OzZinema zineklubak ere bat egin du ospakizun horren harira antolatutako ekintzekin. Bere ekarpena Errenteria-Oreretari, herritarrei, eta urteurren bereziari zinematik egin dio; ezin zuen bestela izan, eta atzera begira jarri da, “iragana ulertu, oraina onartu eta etorkizuna gizarte eta hiri zinemazale gisa erakusteko”.
Zineman film bat ikustea inoiz baino “konprometituagoa” den garaiotan, Errenteria-Oreretak kultura zinematografikoarekin betidanik izan duen lotura ekarri du gogora OzZinemak, eta memoria ariketa proposatu: “King Kong izeneko zinekluba izan zen herrian eratutako lehena eta Alameda Zineman egiten zituen emanaldiak: kaligari heldu zen ondoren, eta On Bide zineman egiten zituen emanaldiak. Azkenik, OzZinema zinekluba heldu zen, eta Niessen zinemetan egiten ditu bere proiekzioak”.
700 urteko historian, kultura aurrera egiteko funtsezko osagaia da OzZinemarentzat, “eta gaur eskainiko dugun saioak herriko zinefiliaren historia ulertzen lagunduko du”. Horretarako, Jose Luis Rebordinios, Errenteria-Oreretako lehenengo zinekluba izan zen King kong klubaren sortzailea eta Donostiako Zinemaldiaren egungo zuzendariari film bat aukeratzeko eskatu zion OzZinemak; Claude Saudet zinemagile frantsesaren azken filma aukeratu du Rebordinosek: Nelly y el señor Arnaud, eta gaur 19:00etan izango den emanaldian aurkezpen lanak egingo ditu.
Nelly banandu berri da eta Arnaud ezagutu du ustekabean. Epaile erretiratua da Arnaud, eta Genevan bizi da haren emaztea beste gizon batekin. Seme-alabek ez diote hitz egiten. Arnaudek lana eskaini dio Nellyri, idatzi duen nobela eskuizkribua mekanografiatzea. Lan harremana aberasgarria izango da bientzat.
Sentimenduz betetako filma, desadostasuna eta maitasun ezintasuna adierazten saiatzen diren keinuz eta isilune esanguratsuz betea dago. Malkorik gabeko tristura, sinplea, sotila, fina, ahaztezina, dela film dio OzZinemak.
Emanaldia gaur, 19:00etan Niessen zinemetan eta doan. Gonbidapenak beharrezkoak dira bertaratzeko, eta horiek Niessen Kulturgunean jaso daitezke.
