Bailara ezagutzen duten udaltzainak nahi dituzte EH Bildu eta Podemosek
2021eko Hautaketa Prozesu Bateratuaren aurkako bozka eman dute oposizioko alderdiek. Euskara hutsean mintzatu dira bi taldeak, Euskaraldiarekin bat eginez.
Euskaraldiaren baitan, Pasaiako udalbatzako alderdi guztiek, PSE-EEk izan ezik, atzoko bilkuran mintzaldiak euskara hutsean egiteko erabakia hartu zuten, hizkuntzarekiko konpromisoa berretsiz. Hautu hori ahoan, Ahal Dugu-Podemos eta EH Bildu alderdietako bozeramaileek hartu zuten hitza 2021eko Hautaketa Prozesu Bateratuaren aurkako bozka emango zutela azaltzeko.
Lehen taldeko Julen Rodriguezek alkateak Euskaraldiaren aldeko saiakerarekin bat egin ez izana mahai gainera atera zuen: “Gure taldeak proposatu zuen udalbatzarra euskara hutsean egiteko ahalegina egin zedin; zoritxarrez, alderdi sozialistaren ordezkaria ez zen etorri, hirugarren aldiz jarraian”.
Puntuarekin jarraituz, Rodriguezek adierazi zuen orain arte erabilitako formula ez dela eraginkorra izan, eta berriak bide bera jarraituko zuela sinetsiz, aurkako bozka emango zuela alderdiak.
Iraitz Pazosek euskara hutsean arituko zela argi utzi eta kudeaketa prozesu bateratuarekiko desados agertu zen: “Uste dugu bateratzeak Udaltzainek Pasaiarekin eta herritarrokin daukaten gertutasunean eragiten duela eta gertutasun hori galdu egiten dela, erkidegoko edonongo udaltzainak baitatoz hemen lan egitera”.
Egoera horrek, Pazosen ustez, gorabeherak sor ditzake Udaltzaingoaren egonkortasunean, horiek “joan etorrian” baitabiltza urte osoan zehar: “Ez dugu ulertzen zergatik goazen akats berdina errepikatzera, ikusten ari garenean Udaltzainak berandu datozela eta gestioa ez dela ona”, gainera, uste dute prozesua hala planteatzeak ez duela aurrekontua bereziki merkatzen ere.
Lore Suarez zinegotzi sozialistak erantzun zuen efizientzia kontua zela prozesua hala egiteko erabakia hartzea, eta horren aurrean iritzi ezberdinak egon badaitezke ere, prozesu bateratua egitea ez dela udaltzainen mugikortasuna areagotzeko arrazoia.
Barne hautaketa bat egiteak ez luke bermatuko langileak hemengoak izatea, Pasaiako Udaltzaingo kargua edonongoa den norbaitek har baitezake, betiere hizkuntza betekizunak konplitzen baditu: “Jarrera batzuk arrazoiekin argudiatzen dira, eta beste batzuk aitzakiekin”.
Pazosek nabarmendu zuen aipatutako mugikortasun arazoez gain, badela beste pisuzko arrazoi bat: “Gestioa bertan egin behar dugu, bertakoa izan behar da, nolabait Oarsoaldeko gestioa egitea defendatuko genuke, horrek ematen baitu aukera aurkezten diren agenteek behintzat bailara ezagut dezaten”.