Gaur ipuin musikatua, larunbatean Anari, eta igandean 'Emakumeak'
Lezoko hainbat eragilek antolatutako 'Indarrez ezer ere ez' kanpainaren barruko ekitaldiak dira, Azaroaren 25arekin lotura dutenak.
Amelie eta Xirrikituen Jostunak taldekoak. Gaur da Azaroak 25, Indarkeria Matxistaren Kontrako Eguna. Horren harira, Lezoko hainbat eragilek elkarlanean egitaraua antolatu dute Indarrez ezer ere ez leloarekin. Horrela, gaur, 19:00etan eta Gezala Auditoriumean, Ameli eta Xirrikituen jostunek Isiltzen joan zirenak ipuin musikatua eskainiko dute. Doan da emanaldia, baina sarrerak agortuta daude. Lurdes Iriondoren obran oinarritutako ikuskizuna da Isiltzen joan zirenak.
Larunbatean, berriz, Anarik kontzertua emango du Gezalan, 19:00etan hasita. Horretarako ere sarrerak agortu egin direla ageri da Lezoko Udalaren webgunean.
Horrez gain, saio berezia antolatu dute iganderako Gezalan, 19:30ean. Lehenik Itsaso Diaz bideogilearen La historia de todas nosotras dokumentalaren emanaldia izango da. Ondoren, Todas nosotras komikia aurkeztuko dute Elisabeth Casillasek eta Higinia Garak. Azkenik, Emakumeak dantza garaikide pieza interpretatuko dute Myriam Perezek eta Jone Amezagak. Bertarako sarrerak erosi behar dira, Lezoko Udalaren txarteldegi zerbitzuaren bitartez (8 euro).
Azaroaren 25eko ekitaldien deitzaileek herritarrei eskatu diete balkoietan zapi gorriak jar ditzaten.
