Indarkeria matxista identifikatu, salatu eta borrokatzera deitu du LAB-ek
Sindikatuak Etxez etxeko laguntza zerbitzuko langileak jarri ditu erdigunean.
LABen elkarretaratzea Foru Plazan Azaroaren 25aren harira. Indarkeria Matxistaren Kontrako Egunean kalera atera dira Oarsoaldeko LABeko delegatuak. Identifikatu, salatu eta borrokatzea ezinbestekotzat jo dute, indarkeria matxista, egiturazkoa dela nabarmenduta, “indarkeria matxista bizitzako esparru guztietan gertatzen da; ez da eremu pertsonal edo pribatukoa, edo bi pertsonaren artekoa, ezta gaixo batzuen ekintza ere. Sistema patriarkalak emakumeok eta sexu genero arauarekiko disidenteak garen pertsonak egokitu nahi diguten mendeko lekuan mantentzeko duten moduetako bat da”.
Lan eremuan ere izaten da indarkeria matxista; ostalaritzan, lantegietan, udaletan, garbiketan, Eusko Jaurlaritzan, nekazaritzan, etxeko lanean, adinekoen egoitzetan, supermerkatuetan, edozein bulegotan, merkataritzan, garraioan, etxez etxeko laguntzan, baita sindikatuetan ere, LABek gaur salatu duenez, “gure apustua indarkeriaren erreparazioa, ez zigortzailea eta erantzukizun komunitarioa da”.
Sindikatuak Etxez etxeko laguntza zerbitzuko langileak jarri ditu erdigunean. Zerbitzu sozialetan azpikontratatutako beste sektoreetako bat da hori, “udalak diru publikoarekin finantzatzen du, eta enpresak etekinak ateratzen ditu, negozio biribila”.
Prekarietatea dela nagusi sektore horretan nabarmendu dute gaurko elkarretaratzean, “ez dute herrialdeko hitzarmenik, jardunaldiak partzialak dira, ez dute beraien osasuna bermatuko duen neurririk, lan karga eta erritmo handiei egin behar diete aurre, eta egoera honek zuzenean eragiten du zerbitzuan”. COVID-19aren pandemiaren testuinguruan, langile horien egoera prekarioagoa bihurtu da, eta LAB sindikatuak gogor salatu du “merkantilizazioan oinarritutako sistemak” porrot egin duela eta instituzioek ez dutela ezer egin “muturreko” egoera hori aldatzeko.
Egoera iraultzea ezinbestekotzat jo dute bildutakoek, eta horretarako, lehenik eta behin langileen ratioak handitu eta herrialdeko hitzarmena sortu behar direla nabarmendu du sindikatuak, eta lehenbailehen egin behar dela gainera; horrekin batera, ezinbestekotzat jo du zerbitzua publifikatzea eta egungo antolaketa goitik behera aldatzea.
Emakumeen bizitzaren prekarizazioa etengabea dela esan du haserre sindikatuak, “eta egoera honetan intentsitate handiagoarekin gertatzen ari da”.
